مارکیٹس اور پلازوں میں لگنے والی آگ کے واقعات تشویشناک، فائر سیفٹی کو نظر انداز کرنا سنگین مجرمانہ غفلت ہے،احمد ندیم اعوان

بدھ 18 جون 2025 21:56

کراچی (اُردو پوائنٹ اخبارتازہ ترین - این این آئی۔ 18 جون2025ء)پاکستان مرکزی مسلم لیگ کراچی کے صدر احمد ندیم اعوان نے شہر قائد میں مارکیٹس، پلازوں اور عوامی مقامات پر آگ لگنے کے بڑھتے ہوئے واقعات پر شدید تشویش کا اظہار کرتے ہوئے کہا ہے کہ یہ واقعات حکومت اور متعلقہ اداروں کی مجرمانہ غفلت اور لاپرواہی کا نتیجہ ہیں۔ حالیہ چند دنوں میں صدر ، ملیر کے بعد ملینیم مال میں لگنے والی ہولناک آگ نے تاجروں کو اربوں روپے کا نقصان پہنچایا، جس پر دلی افسوس ہے۔

انہوں نے کہا کہ یہ بات باعث حیرت و افسوس ہے کہ کراچی جیسے میگا سٹی میں بلند و بالا عمارتوں اور تجارتی مراکز کی تعمیر کے وقت فائر سیفٹی کے بنیادی اصولوں کو یکسر نظرانداز کر دیا جاتا ہے، اور متعلقہ ادارے خاموش تماشائی بنے رہتے ہیں۔

(جاری ہے)

اگر بلڈرز اور مارکیٹ مالکان فائر سیفٹی میں کوتاہی کرتے ہیں تو یہ حکومت کی ذمہ داری ہے کہ وہ سختی سے ان ضوابط پر عملدرآمد کرائے۔

احمد ندیم اعوان نے مطالبہ کیا کہ حکومت حالیہ آتشزدگی کے واقعات میں ہونے والے نقصانات کا ازالہ کرے اور مستقبل میں اس قسم کے حادثات سے بچا کے لیے جامع حکمت عملی مرتب کرے ۔ ان کا مزید کہنا تھا کہ شہریوں کو فائر سیفٹی سے متعلق ٹریننگ دینا وقت کی اہم ضرورت ہے تاکہ ہنگامی صورتحال میں عوام گھبراہٹ کے بجائے ذمہ داری اور شعور کا مظاہرہ کرتے ہوئے جانی و مالی نقصان کو کم سے کم کر سکیں ۔ مرکزی مسلم لیگ ماضی میں بھی کراچی کے مختلف علاقوں میں فائر سیفٹی کی تربیتی کلاسز کا انعقاد کر چکی ہے ۔ اور اپنی مدد آپ کے تحت اس سلسلے کو جاری و ساری رکھنے کے ساتھ اس کا دائرہ کار وسیع کریں گے ۔ مرکزی مسلم لیگ خدمت انسانیت کے جذبے کے ساتھ اس قومی فریضے میں ہر ممکن کردار ادا کرتی رہے گی۔