Live Updates

ملک میں بڑھتی ہوئی آبادی کی شرح ہمارے سارے بجٹ تخمینوں کو تباہ و برباد کر دیتی ہے،مصطفی کمال

جمعرات 19 جون 2025 16:41

اسلام آباد (اُردو پوائنٹ اخبارتازہ ترین - اے پی پی۔ 19 جون2025ء) وفاقی وزیر صحت مصطفی کمال نے کہا ہے کہ بڑھتی ہوئی آبادی ملکی معیشت پر دبائو ڈال رہی ہے، اس مسئلے سے جنگی بنیادوں پر نمٹنے کیلئے ملک کے تمام طبقات کو اپنا کردار ادا کرنا ہو گا، چاروں صوبے اس سلسلے میں اپنا کردار ادا کریں۔ جمعرات کو قومی اسمبلی میں بجٹ پر بحث میں حصہ لیتے ہوئے انہوں نے کہا کہ کہ بجٹ بناتے وقت بنیادی طور پر آبادی کا تخمینہ لگانا پڑتا ہے،ملک میں بڑھتی ہوئی آبادی کی شرح ہمارے سارے بجٹ تخمینوں کو تباہ و برباد کر دیتی ہے۔

انہوں نے کہا کہ ہیپاٹائٹس سی میں ہم دنیا میں پہلے نمبر پر ہیں، شوگر اور دیگر امراض بھی پاکستان میں عام ہیں،ہمارے ہسپتالوں میں اتنا رش ہوتا ہے کہ جلسے کی صورتحال لگتی ہے۔

(جاری ہے)

ماہرین کہتے ہیں کہ 68 فیصد بیماریاں آلودہ پانی کی وجہ سے ہیں،ہمیں قومی سطح پر پینے کے صاف پانی کا انتظام کرنا چاہئے، پینے کے صاف پانی میں سیوریج کا پانی شامل ہوتا ہے جو لوگ استعمال کرتے ہیں اور بیمار پڑ جاتے ہیں۔

انہوں نے کہا کہ چھوٹے بچوں اور نوجوانوں کو کینسر جیسا موذی مرض ہو رہا ہے اس کی بنیادی وجہ آبادی میں اضافہ، وسائل کی کمی اور بے پناہ آلودگی ہے۔انہوں نے کہا کہ صوبوں میں آبادی کی صورتحال کو قابو میں لانے کیلئے صوبائی حکومتوں کو اپنا کردار ادا کرنا چاہئے،ایک دو کروڑ 60 لاکھ بچے سکولوں سے باہر ہیں۔ لاکھوں بچے غذائی قلت کا شکار ہیں ملک میں 10 سے 11 ہزار مائیں ڈلیوری کے وقت فوت ہو جاتی ہیں۔

انہوں نے کہا کہ اگر 2030 تک ہم نے آبادی پر قابو نہ پایا تا ہم دنیا کے زیادہ آبادی والے بڑے ممالک میں شامل ہو جائیں گے،وفاقی حکومت ملک کے چاروں صوبوں علماء کرام سمیت ہر طبقے کو ان بورڈ لے اور آبادی کی شرح کو قابو کرنے کیلئے اقدامات کرے۔ انہوں نے کہا کہ ہر صورت میں 3.5 فیصد سے کم کر کے بچوں کی پیدائش کو 2 فیصد تک لانا ہوگا۔انہوں نے کہا کہ آبادی پر قابو پانا کوئی سیاسی لسانی یا دینی مسئلہ نہیں ہے۔