آسام، پاکستان کے حق میں تبصرے کی پاداش میں ایک اور مسلم شخص گرفتار، تعداد 94ہو گئی

مودی سرکار کی ڈھٹائی کی انتہا، گرفتار کیے جانے والوں میں ایک مسلمان رکن اسمبلی امین الاسلام بھی شامل

ہفتہ 21 جون 2025 20:16

گوہاٹی(اُردو پوائنٹ اخبارتازہ ترین - این این آئی۔ 21 جون2025ء) بھارتی ریاست آسام میں پولیس نے پہلگام واقعے کو مودی حکومت کی سازش قرار دینے اور سوشل میڈیا پر پاکستان کے حق میں تبصروں کی پاداش میں اب تک 94افراد گرفتار کر لیے ہیں۔ گرفتار کیے جانے والوں میں ایک مسلمان رکن اسمبلی امین الاسلام بھی شامل ہیں۔

(جاری ہے)

کشمیر میڈیاسروس کے مطابق پولیس نے گزشتہ روز نالباری کے علاقے میں شفیق الحق نامی شخص کو گرفتار کر لیا جس سے اپریل میں پیش آنے والے پہلگام واقعے کے بعد سے اب تک گرفتار کیے جانے والے افراد کی تعداد 94ہوگئی۔

پولیس نے گزشتہ ماہ وزیر اعلیٰ ہمنتا بسوا شرماکے حکم پر آل انڈیا یونائیٹڈ ڈیموکریٹک فرنٹ کے رکن اسمبلی امین الاسلام کو بھی گرفتار کیا۔امین الاسلام نے کہا تھا کہ 2019کا پلوامہ حملہ اور پہلگام حملہ مودی حکومت کی سازش ہے۔ یاد رہے کہ آسام میں بی جے پی کی حکومت ہے۔ ریاست کے وزیر اعلیٰ ہمنتا بسوا نے اپنی ایک سوشل میڈیا پوسٹ میں پاکستان کے خلاف ہرزہ سرائی کرتے ہوئے لکھا ’’آسام کسی بھی ایسے شخص کو برداشت نہیں کرے گاجو پہلگام واقعے کے سلسلے میں پاکستان کی حمایت کرتا ہو۔‘‘