نائب وزیر اعظم/وزیر خارجہ کی صدرِ ترکیہ سے 51ویں او آئی سی وزرائے خارجہ کونسل کے اجلاس کے موقع پر ملاقات

استنبول (اُردو پوائنٹ اخبارتازہ ترین - اے پی پی۔ 21 جون2025ء) پاکستان اور ترکیہ نے دونوں ملکوں کے درمیان موجودہ تعاون پر اطمینان کا اظہار کرتے ہوئے اس برادرانہ شراکت داری کو مزید وسعت دینے اور گہرے روابط استوار کرنے کے عزم کا اعادہ کرتے ہوئے تجارت، دفاع اور عوامی روابط سمیت مختلف شعبوں میں تعاون بڑھانے پر اتفاق اور ایران کی خودمختاری،علاقائی سالمیت اور اقوام متحدہ کے چارٹر کے تحت اس کے حقِ دفاع کی حمایت کا اعادہ کیا ہے۔

ہفتہ کو دفتر خارجہ کے ترجمان کی جانب سے جاری بیان کے مطابق نائب وزیر اعظم و وزیر خارجہ، سینیٹر محمد اسحاق ڈار نے ہفتہ کو استنبول میں اسلامی تعاون تنظیم (او آئی سی) کی وزرائے خارجہ کونسل کے 51ویں اجلاس کے موقع پر جمہوریہ ترکیہ کے صدررجب طیب ایردوان سے ملاقات کی۔

(جاری ہے)

اس موقع پر چیف آف آرمی اسٹاف،فیلڈ مارشل سید عاصم منیر بھی ان کے ہمراہ تھے۔

ملاقات کے دوران نائب وزیر اعظم نے وزیراعظم محمد شہباز شریف کی جانب سے صدر ایردوان کو نیک خواہشات پہنچائیں۔ انہوں نے پاکستان اور ترکیہ کے درمیان دیرینہ اور برادرانہ تعلقات کو انتہائی اہمیت دینے کے عزم کا اعادہ کیا۔دونوں رہنماؤں نے پاکستان اور ترکیہ کے مابین موجودہ تعاون پر اطمینان کا اظہار کرتے ہوئے اس برادرانہ شراکت داری کو مزید وسعت دینے اور گہرے روابط استوار کرنے کے عزم کا اعادہ کیا۔

انہوں نے تجارت، دفاع اور عوامی روابط سمیت مختلف شعبوں میں تعاون کو فروغ دینے پر اتفاق کیا۔یہ ملاقات دونوں برادر ممالک کے درمیان خطے میں امن، ترقی اور خوشحالی کے لیے مشترکہ جدوجہد کے عزم کی عکاس تھی۔رہنماؤں نے بین الاقوامی قانون کے بنیادی اصولوں کی کھلی خلاف ورزی کرتے ہوئے جاری اسرائیلی حملوں کی شدید مذمت کی۔انہوں نے ایران کی خودمختاری، علاقائی سالمیت اور اقوام متحدہ کے چارٹر کے تحت اس کے حقِ دفاع کی حمایت کا اعادہ کیا۔

صورتحال کو پرامن طریقے سے کم کرنے کے لیے سفارتی کوششیں جاری رکھنے پر اتفاق کیااور بین الاقوامی برادری سے خطے میں امن و استحکام کی بحالی کے لیے اپنا کردار ادا کرنے کی اپیل کی۔دونوں فریقین نے غزہ میں اسرائیلی جارحیت کو فوری طور پر روکنے اور محصور عوام تک انسانی امداد کی بلاتعطل فراہمی کے لیے فوری اقدامات کی اہمیت پر زور دیا۔نائب وزیر اعظم و وزیر خارجہ نے صدر اردوان کو اسلامی تعاون تنظیم یوتھ فورم کی جانب سے ان کی قیادت کے اعتراف اور او آئی سی وزرائے خارجہ اجلاس کے کامیاب انعقاد پر دیے گئے ایوارڈ پر مبارکباد دی۔\932