امریکہ کی طرف سے ایران کے جوہری مقامات پر بمباری ایک "خطرناک موڑ" کی نشاندہی کرتی ہے ، انتونیو گوتریس

پیر 23 جون 2025 01:50

اقوام متحدہ (اُردو پوائنٹ اخبارتازہ ترین - اے پی پی۔ 23 جون2025ء) اقوام متحدہ کے سیکرٹری جنرل انتونیو گوتریس نے کہا ہے کہ امریکہ کی طرف سے ایران کے جوہری مقامات پر بمباری ایک "خطرناک موڑ" کی نشاندہی کرتی ہے اور خبردار کیا کہ خطہ ایک اور تباہی کے کو برداشت نہیں کر سکتا۔اتوار کو سلامتی کونسل کے اجلاس سے خطاب میں اقوام متحدہ کے سربراہ نے کہا کہ فوری جنگ بندی ہونی چاہیے اور سنگین، پائیدار مذاکرات کی طرف لوٹنا چاہیے۔

انہوں نے 15 رکنی کونسل کو بتایا کہ خطے کے لوگ تباہی کی ایک اور لہر کو برداشت نہیں کر سکتے۔ انہوں نے کہا کہ ایران کی جوہری تنصیبات پر امریکی حملوں پر سلامتی کونسل بحث کر رہی ہے کیونکہ روس، چین اور پاکستان نے 15 رکنی باڈی کو تجویز پیش کی تھی کہ مشرق وسطیٰ میں فوری طور پر جنگ کو ختم کرانے کے لیے ایک قرارداد منظور کی جائے۔

(جاری ہے)

سفارت کاروں کا کہنا ہے کہ تینوں ممالک نے مسودے کے متن کو پیش کیا ہے ، لیکن آج اس پر ووٹنگ ہوگی یا نہیں، یہ دیکھنا باقی ہے۔

اپنے ریمارکس میں سیکرٹری جنرل نے سفارت کاری پر زور دیتے ہوئے کہا کہ شہریوں کو تحفظ فراہم کیا جانا چاہیے اور یہ کہ محفوظ میری ٹائم نیویگیشن کی ضمانت ہونی چاہیے۔انہوں نے مزید کہا کہ ہمیں ایک قابل اعتماد، جامع اور قابل تصدیق حل کی ضرورت ہے ۔انٹرنیشنل اٹامک انرجی ایجنسی (آئی اے ای اے) کے ڈائریکٹر جنرل رافیل ماریانو گروسی نے کہا کہ اس وقت آئی اے ای اے سمیت کوئی بھی فرد فورڈو میں زیر زمین نقصان کا اندازہ لگانے کی پوزیشن میں نہیں ہے۔