پاکستان اسٹاک مارکیٹ میں تقریباً 4 ہزار پوائنٹس کی بدترین مندی

ڈالر بھی مزید مہنگا ہو کر 18 ماہ کی بلند ترین سطح پر پہنچ گیا، خطے کی کشیدہ صورتحال کے باعث پاکستان کی معیشت پر منفی اثرات نمایاں ہونا شروع ہو گئے

محمد علی پیر 23 جون 2025 20:06

لاہور (اُردو پوائنٹ اخبارتازہ ترین۔ 23 جون2025ء) پاکستان اسٹاک مارکیٹ میں تقریباً 4 ہزار پوائنٹس کی بدترین مندی، ڈالر بھی مزید مہنگا ہو کر 18 ماہ کی بلند ترین سطح پر پہنچ گیا۔ تفصیلات کے مطابق خطے کی کشیدہ صورتحال کے باعث پاکستان کی معیشت پر منفی اثرات نمایاں ہونا شروع ہو گئے۔ پیر کے روز کاروباری ہفتے کے آغاز پر ہی پاکستان اسٹاک مارکیٹ میں بدترین مندی ہوئی۔

پاکستان اسٹاک ایکسچینج میں آج کاروبار کا منفی رجحان رہا جس کے باعث سرمایہ کاروں کو اربوں کا نقصان برداشت کرنا پڑا۔ کاروباری ہفتے کے پہلے روز کاروبار کے آغاز پر ہی سٹاک مارکیٹ میں شدید مندی ریکارڈ کی گئی جو کاروباری روز کے اختتام تک برقرار رہی جس کے باعث ہنڈرڈ انڈیکس 3855 پوائنٹس کی کمی کیساتھ ایک لاکھ 16 ہزار 167 پوائنٹس کی کم ترین سطح پر بند ہوا۔

(جاری ہے)

واضح رہے کہ گزشتہ کاروباری ہفتے کے آخری روز اسٹاک مارکیٹ میں ہنڈرڈ انڈیکس 20 پوائنٹس اضافے کیساتھ ایک لاکھ 20 ہزار 23 پوائنٹس کی سطح پر بند ہوا تھا۔ اسٹاک مارکیٹ میں آج 15 ارب 90 کروڑ 56 لاکھ 20 ہزار 424 روپے مالیت کے 19 کروڑ 61 لاکھ 90 ہزار 358 شیئرز کا لین دین ہوا۔ دوسری جانب انٹربینک مارکیٹ میں امریکی ڈالر کے مقابلے میں پاکستانی روپے کی قدر میں کمی ریکارڈ کی گئی ہے، ڈالر کی قیمت 18 ماہ کی بلند ترین سطح پر پہنچ گئی۔

سٹیٹ بینک آف پاکستان کے مطابق پیر کو انٹربینک مارکیٹ میں امریکی ڈالر کے مقابلے میں پاکستانی روپے کی قدر میں 16 پیسے کی کمی ریکارڈ کی گئی ہے جس کے بعد اس کی نئی قیمت 283 روپے 86 پیسے ہو گئی ہے۔ انٹربینک مارکیٹ میں سعودی ریال کی قدر 75 روپے 65 پیسے جبکہ بحرینی دینار کی قدر 752 روپے 37 پیسے رہی۔ اسی طرح عمانی ریال کی انٹربینک مارکیٹ میں قدر 737 روپے 23 پیسے رہی، کویتی دینار کی قدر 926 روپے 75 پیسے اور قطری ریال کی قدر 77 روپے 87 پیسے ریکارڈ کی گئی۔دوسری جانب اوپن مارکیٹ میں امریکی ڈالر کی قیمت خرید 283 روپے 25 پیسے اور قیمت فروخت 285 روپے 50 پیسے ریکارڈ کی گئی۔