Live Updates

اسرائیلی وزیراعظم کا سرکاری طور پر باقاعدہ جنگ بندی کا اعلان

نیتن یاہو نے امریکی صدر کے ایران کے ساتھ جنگ بندی کے اعلان کی توثیق کردی

ساجد علی منگل 24 جون 2025 11:33

اسرائیلی وزیراعظم کا سرکاری طور پر باقاعدہ جنگ بندی کا اعلان

تل ابیب ( اُردو پوائنٹ اخبارتازہ ترین۔ 24 جون 2025ء ) اسرائیلی وزیراعظم کی جانب سے سرکاری طور پر ایران کے ساتھ باقاعدہ جنگ بندی کا اعلان کردیا گیا۔ عالمی نیوز ایجنسی رائٹرز کے مطابق اسرائیل کے وزیر اعظم نیتن یاہو نے امریکی صدر کے ایران کے ساتھ جنگ بندی کے اعلان کی توثیق کردی ہے، اس حوالے سے اسرائیلی وزیراعظم کا کہنا ہے کہ اسرائیل نے امریکی صدر ڈونلڈ ٹرمپ کی ایران کے ساتھ جنگ بندی کی تجویز پر اتفاق کرلیا ہے، تاہم سیز فائر کی کسی بھی قسم کی خلاف ورزی کی صورت میں اسرائیل کی جانب سے اس کا طاقتور جواب دیا جائے گا۔

اسی طرح ایران اور اسرائیل کے درمیان جنگ بندی کے آغاز کے بعد ایرانی وزیر خارجہ عباس عراقچی کا بھی اہم بیان سامنے آگیا، انہوں نے کہا ہے کہ اسرائیل کو اس کی جارحیت کی سزا دینے کے لیے ہماری طاقتور مسلح افواج کی فوجی کارروائیاں صبح 4 بجے تک آخری لمحات تک جاری رہیں، میں تمام ایرانیوں کے ساتھ مل کر اپنی بہادر مسلح افواج کا شکریہ ادا کرتا ہوں جو اپنے خون کے آخری قطرے تک ہمارے پیارے ملک کے دفاع کے لیے تیار رہیں اور جنہوں نے دشمن کے کسی بھی حملے کا آخری لمحے تک جواب دیا۔

(جاری ہے)

واضح رہے کہ اسرائیل اور ایران نے جنگ بندی کا آغاز کردیا ہے، پاکستان وقت کے مطابق ایران نے صبح 9 بجے سے جنگ بندی پر عملدرآمد شروع کیا گیا، امریکی صدر ڈونلڈ ٹرمپ نے اپنے ایک بیان میں کہا کہ ’جنگ بندی کا آغاز ہوگیا ہے برائے مہربانی جنگ بندی کی خلاف ورزی نہ کریں‘، امریکی نشریاتی ادارے سی این این نے بتایا کہ ایران اور اسرائیل کے درمیان سیز فائر کا نفاذ ہوچکا ہے جس کے بعد اسرائیل نے اپنی فضائی حدود بھی کھول دی۔

اس ضمن میں ایرانی سرکاری میڈیا کا کہنا تھا کہ دشمن پر جنگ بندی نافذ کر دی گئی ہے، جنگ بندی امریکی جارحیت کے جواب میں فوجی ردعمل کے بعد کی گئی، امریکی جارحیت کے جواب میں کامیاب میزائل آپریشن کے بعد جنگ بندی کی، پاسداران انقلاب کے کامیاب میزائل آپریشن اور سرزمین کے دفاع میں شہریوں کی مثالی ثابت قدمی اور اتحاد کے باعث دشمن پر جنگ بندی نافذ کی گئی ہے۔