خیبرپختونخوا پولیس نے جدید اینٹی ڈرون سسٹم حاصل کر لیا

ٹیکنالوجی پولیس کو میلوں دور سے دہشتگردوں کے استعمال کردہ ڈرونز کو نشانہ بنانے اور مار گرانے کی صلاحیت فراہم کرے گی

بدھ 25 جون 2025 19:55

خیبرپختونخوا پولیس نے جدید اینٹی ڈرون سسٹم حاصل کر لیا

پشاور(اُردو پوائنٹ اخبارتازہ ترین - این این آئی۔ 25 جون2025ء) خیبرپختونخوا پولیس نے دہشتگردی کے بڑھتے ہوئے فضائی خطرات سے نمٹنے کے لئے جدید اینٹی ڈرون سسٹم حاصل کرلیا ہے۔سرکاری ذرائع کے مطابق یہ ٹیکنالوجی پولیس کو میلوں دور سے دہشتگردوں کے استعمال کردہ ڈرونز کو نشانہ بنانے اور مار گرانے کی صلاحیت فراہم کرے گی۔ذرائع کے مطابق یہ سسٹم نہ صرف اہم سرکاری عمارتوں، شخصیات اور تقریبات کی حفاظت کے لیے استعمال کیا جائے گا بلکہ اسے محرم کے جلوسوں میں سیکیورٹی اقدامات کا حصہ بھی بنایا جائے گا۔

(جاری ہے)

ذرائع کے مطابق ماضی میں دہشتگردوں کی جانب سے شمالی وزیرستان اور جنوبی اضلاع میں حملوں کے لئے ڈرونز کا استعمال کیا گیا، جبکہ پاک بھارت کشیدگی کے دوران بھارت نے بھی پاکستان پر حملوں میں ڈرون ٹیکنالوجی کا سہارا لیا۔آئی جی خیبرپختونخوا ذوالفقار حمید نے تصدیق کی ہے کہ پولیس کو جدید اسلحہ اور سازوسامان سے لیس کیا جا رہا ہے اور مزید ٹیکنالوجی حاصل کرنے پر بھی کام جاری ہے۔آئی جی کا کہنا تھا کہ دہشتگردی کے بدلتے ہوئے طریقوں کے پیش نظر پولیس کو ہر ممکن حد تک جدید اور مؤثر بنانے کی کوشش کی جا رہی ہے تاکہ عوام کی جان و مال کا تحفظ ہر حال میں یقینی بنایا جا سکے۔