کوہستان میں 40 ارب کا میگا کرپشن سکینڈل ، 5 ارب روپے کے مشکوک بینک اکانٹس منجمد، ملزمان کے گھروں سے غیر ملکی کرنسی و3 کلوسونا برآمد

پشاور(اردوپوائنٹ اخبار تازہ ترین۔26جون 2025)کوہستان میں 40ارب کا میگا کرپشن سکینڈل میں اہم پیش رفت،نیب نے 5 ارب روپے کے مشکوک بینک اکانٹس منجمد کردئیے جبکہ ملزمان کے گھروں سے غیر ملکی کرنسی وسونابرآمدکرلئے گئے جبکہ کئی جائیدادیں اور قیمتی گاڑیاں تحویل میں لے لی گئیں،ڈان نیوز کے مطابق اسلام آباد، راولپنڈی، ایبٹ آباد، مانسہرہ اور پشاور میں اربوں روپے مالیت کی 109 کمرشل پراپرٹیز سیل کی گئیں۔

نیب نے ملزمان کے 4 فارم ہاؤسز، 12 کمرشل پلازے اور 2 کمرشل پلاٹس سیل کر دئیے، 30 گھر، 12 دکانیں، 25 فلیٹس، 175 کنال زرعی زمین اور دیگراہم جائیدادیں بھی سیل کی گئی ہیں۔نیب نے کروڑوں روپے مالیت کی 77 قیمتی لگژری گاڑیاں تحویل میں لے لیں۔نیب کی جانب سے میگا کرپشن اسکینڈل میں مزید کارروائی کا سلسلہ بھی جاری ہے۔

(جاری ہے)

دوسری جانب تحریک انصاف کے رہنما اعظم سواتی کو نیب خیبرپختونخواہ نے کوہستان میں 40 ارب روپے کے مبینہ کرپشن سکینڈل میں تفتیش کیلئے طلب کیا تاہم وہ خود پیش نہ ہوئے۔

ذرائع کاکہناہے کہ نیب حکام نے وکیل کو واضح طور پر بتایا کہ اعظم سواتی کو ذاتی حیثیت میں پیش ہونا ہوگا۔ وکیل کی موجودگی کافی نہیں۔ وکیل نے مؤقف اختیار کیا کہ اعظم سواتی سے رابطہ ممکن نہیں ہو رہا اور ان کی جانب سے پیشی کیلئے مہلت دی جائے تاہم نیب حکام نے مزید وقت دینے سے انکار کر دیا۔نیب ذرائع کا کہنا ہے کہ آج طلبی کا نوٹس جاری کیا گیا تھا اور اعظم سواتی کو ریکارڈ سمیت پیش ہونا تھا۔

عدم پیشی کی صورت میں دوسرا نوٹس جاری کریں گے۔ذرائع کے مطابق سکینڈل میں اعظم سواتی پر 30 کروڑ روپے کی رقم منتقلی کا الزام ہے جس کی تفتیش نیب خیبرپختونخوا ہ کر رہا ہے۔خیال رہے کہ اس سے قبل کوہستان میگا کرپشن سکینڈل میں مزید اہم پیش رفت،نیب کی کارروائی کے دوران ہیڈکلرک کے گھر سے کروڑوں روپے کی کرنسی، سونا، گاڑیاں ودیگر سامان برآمد کرلیاگیاتھا۔

مرکزی کردار ڈمپر ڈرائیور کی چیک بک بھی برآمد، نیب نے ہیڈ کلرک کو رشتے دارسمیت حراست میں لے لیاگیاتھا۔بتایا گیا تھا کہ نیب کی ٹیم نے ایبٹ آباد میں سٹیڈیم روڈ پر چھاپہ مار کر سی این ڈبلیو کے ہیڈکلرک کے گھر سے بھاری تعداد میں نقدی، سونا، گاڑیاں ودیگر سامان اورسمیت پراپرٹی کے کاغذات قبضے میں لے گئے تھے۔اس حوالے سے مشتاق غنی کاکہنا ہے کہ2019ء سے 2024ئتک یہ سب سے بڑی میگاکرپشن تھی سی اینڈ ڈبلیو،بینک سمیت دیگرمحکموں کے افسران ملوث ہوسکتے ہیں۔

پبلک اکاونٹس کمیٹی بھی اس کرپشن سکینڈل کی تحقیقات کررہی تھی۔ہمیں خیبر پختونخوا ہ کے انتیس اضلاع میں کرپشن کی خبریں زیرگردش تھیں ان کی بھی تحقیقات کریں گے۔نیب نے اب تک مختلف کارروائیوں کے دوران اٹھارہ ارب روپے برآمد کرلئے تھے۔مالیاتی سکینڈل میں صوبے کے خزانے سے چالیس ارب روپے نکالنے کا انکشاف ہوا تھا۔یاد رہے  اپر کوہستان کے 40 ارب روپے کے میگا کرپشن سکینڈل میں محکمہ خزانہ خیبرپختونخوا ہ نے مبینہ طور پر ملوث مزید 10 افسران کو معطل کر دیاتھا۔

اپر کوہستان میں اربوں روپے کے کرپشن سکینڈل کی تحقیقات میں پیش رفت جاری تھی۔ محکمہ خزانہ کا کہنا تھا کہ معطل کئے گئے افسران میں ایک گریڈ 18 اور3 گریڈ 17 کے افسران شامل، گریڈ 16 کے 5 اور اسکیل 11 کا ایک سرکاری ملازم بھی کرپشن معاملے میں معطل کیا گیا تھا۔