بحیثیت قوم ہم کبھی بھی بھارت کے آگے جھکے ہیں اور نہ جھکیں گے، دشمن کی اجارہ داری قبول نہیں، فیلڈ مارشل عاصم منیر

راولپنڈی(اردوپوائنٹ اخبار تازہ ترین۔27جون 2025)فیلڈ مارشل آرمی چیف جنرل سید عاصم منیر کا کہنا ہے کہ بحیثیت قوم ہم پاکستانی کبھی بھی بھارت کے آگے جھکے ہیں اور نہ جھکیں گے، دشمن کی اجارہ داری قبول نہیں،خطے میں دہشتگردی کا سب سے بڑا سر پرست ہندوستان ہے ہم ہندوستان کو واضح پیغام دیتے ہیں کہ پاکستان نے نہ پہلے اس کی اجارہ داری قبول کی اور نہ کبھی کرے گا،پاک فوج کے شعبہ تعلقات عامہ(آئی ایس پی آر)کے مطابق52 ویں کامن ٹریننگ پروگرام کے افسران سے اہم خطاب کرتے ہوئے فیلڈ مارشل سید عاصم منیر کا کہنا تھا کہ معرکہ حق میں ریاست کی تمام اکایؤں نے مثالی ہم آہنگی کا مظاہرہ کیا اس میں پاکستان نے کشمیر لائن آف کنٹرول سے لے کر ساحل سمندر تک بھارت کی بلا جواز جارحیت کے خلاف بہترین جواب دیا۔

(جاری ہے)

اللہ نے معرکہ حق میں ہماری مدد کی کیونکہ ہم حق پر تھے۔ فیلڈ مارشل سید عاصم منیر نے کہا کہ افواج پاکستان دور حاضر کے جنگی تقاضوں کے مطابق اپنے آپ کو ہمہ وقت تیار رکھتی ہیں۔آرمی چیف کاکہنا تھا کہ دہشتگردی ہندوستان کا اندرونی مسئلہ ہے جو اس کا اپنی اقلیتوں اور بالخصوص مسلمانوں پر متعصبانہ اور ظالمانہ رویوں کا نتیجہ ہے۔سید عاصم منیر کا کہنا تھا کہ افغانستان ہمارا برادر پڑوسی اسلامی ملک ہے اور ہم اس سے اچھے تعلقات چاہتے ہیں تاہم ہم ان سے ایک ہی تقاضا کرتے ہیں کہ وہ ہندوستان کی دہشت گردانہ پراکسیز فتنہ الہندوستان اور فتنہ الخوارج کو جگہ نہ دیں۔

انہوں نے کہا کہ ہر نظام میں مسائل اور کمزوریاں ہوتی ہیں، کمزوریوں اور منفی قوتوں کو نظام پر حاوی نہ ہونے دیں جو اقوام اپنی تاریخ کو بھول جاتی ہیں ان کا مستقبل بھی تاریک ہو جاتا ہے۔فیلڈ مارشل سید عاصم منیر نے افسران کو ہدایت کی کہ اپنی انفرادی اور علاقائی پہچان سے بڑھ کر پاکستانیت کی پہچان کو اپنائیں۔ ہر نظام میں مسائل اور کمزوریاں ہوتی ہیں۔

آپ کا کام ہے کہ کمزوریوں اور منفی قوتوں کو نظام پر حاوی نہ ہونے دیں۔آرمی چیف سید عاصم منیرنے کہا کہ جو اقوام اپنی تاریخ کو بھول جاتی ہیں انکا مستقبل بھی تاریک ہو جا تا ہے۔ پاکستان کی کہانی اور تاریخ کو جانیے اور اپنی اگلی نسلوں تک پہنچائیں۔ ملک سے محبت اور وفاداری اولین اور بنیادی شرط ہے، اپنے اندر جرات، قابلیت اور کردار پیدا کریں اگر ان میں سے ایک جزو کو چننا ہو تو ہمیشہ کردار کو فوقیت دیجیے گا۔

پاکستان کی کہانی اور تاریخ کو جانیے اور اپنی اگلی نسلوں تک پہنچائیں، ملک سے محبت اور وفاداری اولین اور بنیادی شرط ہے۔ اپنے اندر جرات، قابلیت اور کردار پیدا کریں اور اگر ان میں سے ایک جزو کو چننا ہو تو ہمیشہ کردار کو فوقیت دیں۔گفتگو کے دوران فیلڈ مارشل سید عاصم منیر کا مزید کہنا تھا کہ ملک کی ترقی اور کامیابی کیلئے عوام، حکومت اور افواج کے درمیان مضبوط تعلق نا گزیر ہے۔ ریاست کی تمام اکائیوں کے درمیان ہم آہنگی کی اساس پاکستان کی انتظامیہ اور سول بیوروکریسی ہے اس کی بھاری اور اہم ذمہ داری آپ پر عائد ہوتی ہے۔52ویں کامن ٹریننگ پروگرام کے افسران نے کشمیر، خیبرپختونخوا، بلوچستان میں پاک فوج کی کارروائیوں کا مشاہدہ کیا۔