محرم الحرام اخوت، بھائی چارے اور آواز حق پہ لبیک کہنے کا درس دیتا ہے، نئے ہجری سال کے آغاز پر وفاقی وزیر عبدالعلیم خان کا پیغام

جمعہ 27 جون 2025 22:43

اسلام آباد (اُردو پوائنٹ اخبارتازہ ترین - این این آئی۔ 27 جون2025ء)صدر استحکام پاکستان اور وفاقی وزیر مواصلات عبدالعلیم خان نے نئے ہجری سال کے آغاز پر قوم کیلئے نیک خواہشات کا اظہار کرتے ہوئے کہا ہے کہ قمری سال پر تمام مسلم امہ اور ہر پاکستانی کے لئے دعا گو ہیں، محرم الحرام ہمارے لیے عزم و استقلال اور باہمی اخوت کا استعارہ ہے اور یہ مہینہ باہمی محبت، بھائی چارے اور آواز حق پہ لبیک کہنے کا درس دیتا ہے۔

(جاری ہے)

وفاقی وزیر عبدالعلیم خان نے ایکس پر جاری اپنے پیغام میں مزید کہا کہ نواسہ رسول اور ان کے رفقائے کار نے محرم الحرام میں اپنے خون سے دین اسلام کی آبیاری کی، حسینی نظریہ سچائی کے لئے باطل کے آگے ڈٹ جانے کا عملی پیغام دیتا ہے اور ان کے اسوہ حیات پر چل کر ہی مسلمان اللہ تعالیٰ کی خوشنودی حاصل کر سکتے ہیں۔انہوں نے وطن عزیز کی حفاظت اور عالم اسلام کی سربلندی کیلئے دعا کرتے ہوئے کہا کہ نیا سال انتہا پسندی کے خاتمے اور امن و آشتی کا باعث ہو۔