حکومت نے ایک بار پھر عوام کو لولی پاپ دکھایا،بارشوں نے حکومتی دعووں کا پول کھول دیا،ثروت اعجاز قادری

عید الضحی پر صاف کیے جانے والے نالوں کا کچرا نہ اٹھانے کی وجہ سے گندگی اور غلاظت کے ڈھیر ہر طرف نظر آرہے ہیں،چیئرمین پاکستان سنی تحریک

پیر 30 جون 2025 19:05

کراچی(اُردو پوائنٹ اخبارتازہ ترین - این این آئی۔ 30 جون2025ء)وقت سے پہلے تدابیر اختیار کرنا حکومت کی ذمہداری ہوتی ہے مگر حکومت صرف زبانی کلامی باتیں کر کے عوام کو بھلا دیتی ہے۔متعلقہ محکمہ کی کارکردگی نے ایک بار پھر عوام کو مایوس کیا ہے۔ان خیالات کا اظہار پاکستان سنی تحریک کے چیئرمین انجینیئر محمد ثروت اعجاز قادری نے مقامی این جی اوز کے وفد سے ملاقات کے موقع پر کرتے ہوئے کیا۔

ملاقات کے لیے آنے والے وفد نے ثروت اعجاز قادری کو شہر کی صورتحال سے سے آگاہ کرتے ہوئے کہا کہ متعلقہ محکمہ اور میئر کراچی سب اچھے کی رپورٹ دے رہے ہیں مگر صورتحال اس کے برعکس ہے۔مرکزی شہروں کو صاف کرنے میں متعلقہ محکمہ دن رات ایک کر دیتا ہے۔مگر اطراف کی سڑکیں اور دیگر علاقوں کا برا حال ہے۔

(جاری ہے)

ثروت اعجاز قادری نے وفد سے گفتگو کرتے ہوئے کہا کہ بارش کا پانی کھڑا رہنے کی وجہ سے ٹوٹی پھوٹی سڑکیں دلدل کی صورتحال اختیار کر گئی ہیں۔

گاڑی پر سفر کرنا تو دور کی بات پیدل چلنا بھی محال ہے۔حکومت نے ایک بار پھر عوام کو لولی پاپ دکھایا ہے۔وقت سے پہلے کوئی انتظامات نہیں کیے گئے جس کی وجہ سے آج ہر کسی کو پریشانی کا سامنا ہے۔ثروت اعجاز قادری نے گفتگو کرتے ہوئے مزید کہا کہ بارشوں نے حکومتی دعووں کا پول کھول دیا ہے۔عید الضحی پر صاف کیے جانے والے نالوں کا کچرا نہ اٹھانے کی وجہ سے گندگی اور غلاظت کے ڈھیر ہر طرف نظر آرہے ہیں۔

وبائی امراض بھی پھیلنے کا اندیشہ بڑھ گیا ہے۔حکومت ہمیشہ عوام کے ساتھ ایسا رویہ اختیار کرتی ہے۔اندرونی علاقوں کی گلیوں کا یہ حال ہے کہ ہر طرف تالاب کا منظر نظر آرہا ہے۔شہری اپنی مدد آپ کے تحت کام کر رہے ہیں مگر متعلقہ محکمہ کے کان پر جوں تک نہیں رینگ رہی ہے۔ٹوٹی پھوٹی سڑکوں اور گڑھوں کو بھرنے کا کام بھی شہریوں نے اپنے کاندھوں پر اٹھا لیا ہے۔