وزیراعظم نے ملک سنوارنے کا تہیہ کررکھا ہے ،ملک کو درپیش چیلنجز سے باہر نکال کر ڈیفالٹ سے بچایا، وفاقی وزیر ریلوے حنیف عباسی

لاہور (اُردو پوائنٹ اخبارتازہ ترین - اے پی پی۔ 01 جولائی2025ء) محکمہ ریلوے اور اخوت اسلامک مائیکرو فنانس کے درمیان قلیوں کو بلاسود قرضہ فراہم کرنے کی یادداشت پر دستخط کردیئے گئے،قلی بیس ماہ کیلئے پچاس ہزار روپے تک کا بلاسود قرضہ لے سکیں گے۔وفاقی وزیر ریلوے حنیف عباسی نے منگل کو لاہور ریلوے اسٹیشن پر محکمہ ریلوے اور اخوت مائیکرو فنانس اسلامک کے مابین قلیوں کو50 ہزار روپے تک بلا سود قرضہ دینے کیلئے مفاہمتی یادداشت پر دستخط کے حوالے سے منعقدہ تقریب سے خطاب کرتے ہوئے کہا کہ وزیراعظم نے ملک کو سنوارنے کا تہیہ کر رکھا ہے۔

انہوں نے ملک کو درپیش چیلنجز سے باہر نکال کر ڈیفالٹ سے بچایا اور دشمن کو ایسا جواب دیا جو ہمیشہ یاد رہے گا۔انہوں نے کہا کہ مسلم لیگ( ن)کی حکومت نے ہمیشہ ملک کو چیلنجز سے باہر نکالا،دشمن کے بزدلانہ حملہ کا ایسا جواب دیا کہ جسے تاریخ ہمیشہ یاد رکھے گی۔

(جاری ہے)

حنیف عباسی نے کہا کہ سیلون کو انسپکشن کے علاوہ کوئی ریلوے کا افسر استعمال نہیں کرے گا بلکہ ہم سیلون کو عام عوام کو کرایہ پر دینے کی تیاری کر رہے ہیں۔

انہوں نے کہا کہ ہم نے تہیہ کرلیا ہے کہ ریلوے میں اصلاحات لاکر تقدیر بدل دیں گے۔انہوں نے بتایا کہ 19جولائی کو وزیراعظم محمد شہباز شریف لاہور ریلوے اسٹیشن میں ترقیاتی کاموں کا افتتاح بھی کریں گے۔ انتظامیہ کو ہدایت کی ہے کہ مزدور کی مزدوری پسینہ خشک ہونے سے پہلے دیں گے،ریلوے میں اوور ٹائم کا بھی مسئلہ حل کر دیا ہے۔وفاقی وزیر نے کہا کہ قلیوں سے محبت آج کی نہیں ہے، ہم اسٹیشن سے گزر کر ہی سکول جایا کرتے تھے اس وقت سے ہم ان کو سامان اٹھاتے دیکھ رہے ہیں جو اپنے خون پسینہ کی کمائی کھاتے ہیں۔

اخوت مائیکروفنانس کے چیئرمین ڈاکٹر امجد ثاقب نے کہا کہ ریلوے کے ڈیڑھ سو قلیوں کیلئے چالیس لاکھ روپے کی رقم رکھی گئی ہے،جس میں سے پچاس ہزار روپے فی کس بلاسود قرضہ دیا جائے گا۔ان کہنا تھاکہ قلی کا کوئی بچہ یا بچی ایف اے۔ایف ایس سی کا امتحان پاس کرکے کمپیوٹر کورس کرنا چاہے گا تو تین سے6 ماہ تک کے مفت کورس کروائیں گے،معاہدہ کے تحت بلاسود قرض صرف ان قلیوں کو ہی دیا جائے گا جو دو سال سے محکمہ ریلوے میں رجسٹرڈ ہیں اور قلیوں کو دیئے جانے والا قرض 20 اقساط پر مبنی ہوگا جبکہ ایک فیصد اوپر قرضہ جمع کروانے سے محکمہ ریلوے قلیوں کو ڈیتھ کور دے گا۔

اس موقع پر ڈاکٹر امجد ثاقب نے اعلان کیا کہ ریلوے پولیس کے گریڈ ایک تا پانچ تک کے ملازمین کو بھی بلا سود قرضہ دیا جائے گا،جس کیلئے ہم نے علیحدہ سے40 لاکھ روپے مختص کئے ہیں ۔انہوں نے بتایا کہ ہم نے تین سو ارب روپے چالیس لاکھ خاندانوں کو بلاسود قرض کی صورت میں دیئے ہیں،ہم پاکستان کے ہر ریلوے ہیڈ کوارٹرز میں جاکر لوگوں کو قرضہ دیں گے۔انہوں نے کہا کہ قلی پورے پاکستان کی خدمت کرتے ہیں ،جو ان کو ملتا ہے وہ خون پسینے کی کمائی ہے ،اگر انہیں قرض حسنہ دیدیں تو وہ شاید مسکرا دیں۔