چیف جسٹس آزادجموں وکشمیر جسٹس راجہ سعید اکرم خان سے سپریم کورٹ بار ایسوسی ایشن پاکستان کے وفد کی ملاقات

منگل 1 جولائی 2025 21:49

مظفرآباد (اُردو پوائنٹ اخبارتازہ ترین - اے پی پی۔ 01 جولائی2025ء) چیف جسٹس سپریم کورٹ آف آزادجموں وکشمیر جسٹس راجہ سعیداکرم خان نے کہا ہے کہ پاکستان ہمارے حقوق کا محافظ ہے ، بارایسوسی ایشنز مسئلہ کشمیر کو اجاگر کریں ، آزادکشمیر کی سپریم کورٹ میں معززججز کی بہترین ٹیم موجود ہے ۔ ان خیالات کا اظہار انہوں نے منگل کو سپریم کورٹ بار ایسوسی ایشن آف پاکستان کے وفد سے گفتگو کرتےہوئے کیا۔

سپریم کورٹ بار ایسوسی ایشن پاکستان کے وفد نے سپریم کورٹ آزادجموں وکشمیر کا دورہ کیا اور چیف جسٹس آزادجموں وکشمیر جسٹس راجہ سعید اکرم خان سے ملاقات کی ۔ اس موقع پر سپریم کورٹ آزادجموں وکشمیر کے سینئر جج جسٹس خواجہ محمد نسیم اور جج سپریم کورٹ جسٹس رضا علی خان بھی موجودتھے ۔

(جاری ہے)

سپریم کورٹ بارایسوسی ایشن کے وفد میں صدر بار میاں محمد روف عطا، سینئر نائب صدر ندیم قریشی، نائب صدور اسحاق نتوزئی،رانا غلام سرور،فدابہادر، سیکرٹری جنرل سلمان منصور کے علاوہ سپریم کورٹ بار ایسوسی ایشن آزاد کشمیر کے جنرل سیکرٹری مہر بخاری ایڈووکیٹ، صدر سینٹرل بار ایسوسی ایشن مظفرآباد انیس گیلانی،جنرل سیکرٹری سینٹرل بار توفیق احمد چوہدری ایڈووکیٹ ودیگر اراکین بار شامل تھے ۔

چیف جسٹس آزاد کشمیر راجہ سعید اکرم خان نے کہاکہ کوشش ہوتی ہے کہ جو کیس آئے اس کو جلد سے جلد فیصلہ کیاجائے ۔ انہوں نے کہاکہ کشمیر کی تاریخ بہت پرانی ہے ، یہاں کے لوگوں نے اس خطہ کوآزادکروایا ہے ۔کشمیر کا کلچر ایک منفرد حیثیت رکھتا ہے ، کشمیر کے لوگوں نے زندگی کے ہر شعبہ میں کارہائے نمایاں سرانجام دیے ہیں ۔ا نہوں نے وکلا پر مسئلہ کشمیر کو اجاگر کرنے پر زور دیا۔