Live Updates

قانونی پیچیدگیوں کے باعث فائیو جی سپیکٹرم کی نیلامی کا عمل تاخیر کا شکار ہے، شزا فاطمہ

بجٹ کے بعد اب فائیو جی نیلامی کیلئے اسپیکٹرم آکشن کمیٹی کا اجلاس ہونا چاہئے، امید ہے پاکستان میں فائیو جی کا خواب جلد حقیقت بنے گا،وفاقی وزیر آئی ٹی

منگل 1 جولائی 2025 21:00

اسلام آباد (اُردو پوائنٹ اخبارتازہ ترین - این این آئی۔ 01 جولائی2025ء)وفاقی وزیر آئی ٹی شزا فاطمہ نے کہا ہے کہ قانونی پیچیدگیوں کے باعث فائیو جی سپیکٹرم کی نیلامی کا عمل تاخیر کا شکار ہے،ٹیلی نار اور پی ٹی سی ایل کے انضمام کے معاملے پر مسابقتی کمیشن آف پاکستان کی منظوری کا انتظار ہے جس کے بغیر نیلامی کا عمل آگے نہیں بڑھ سکتا۔جاری بیان میں وفاقی وزیر آئی ٹی نے واضح کیا کہ مسابقتی کمیشن آف پاکستان ایک خودمختار ادارہ ہے جو آزادانہ فیصلے کرتا ہے ،اسی لئے اس عمل میں کسی قسم کی مداخلت نہیں کی جا سکتی۔

انہوں نے بتایا کہ اس معاملے پر ریگولر فیڈبیک وزیر خزانہ اور اسپیکٹرم آکشن کمیٹی کے سربراہ لے رہے ہیں تاکہ عمل کو جلد از جلد مکمل کیا جا سکے۔شزا فاطمہ نے کہا کہ وزارت آئی ٹی کی جانب سے وزیر خزانہ سے اسپیکٹرم آکشن کمیٹی کے اجلاس کے انعقاد کی باضابطہ درخواست بھی کی گئی ہے ،اب جبکہ بجٹ اجلاس ختم ہو چکا ہے، فائیو جی نیلامی کیلئے اسپیکٹرم آکشن کمیٹی کا اجلاس منعقد ہو جانا چاہیے۔

(جاری ہے)

وفاقی وزیر نے بتایا کہ فائیو جی نیلامی کے عمل کے لیے تھرڈ پارٹی کنسلٹنسی فرم اپنی رپورٹ مکمل کر چکی ہے، جو اسپیکٹرم آکشن کمیٹی کے آئندہ اجلاس میں پیش کی جائے گی، اسی اجلاس میں یہ فیصلہ بھی کیا جائے گا کہ فائیو جی اسپیکٹرم کی نیلامی کب اور کس طریقہ کار کے تحت کی جائے گی۔انہوں نے امید ظاہر کی کہ تمام رکاوٹیں جلد دور ہو جائیں گی اور پاکستان میں فائیو جی کا خواب جلد حقیقت بنے گا۔