عوامی رکشہ یونین کا پٹرولیم مصنوعات کی قیمتوں میں ہوشربا اضافے ،مہنگائی کیخلاف احتجاجی مظاہرہ

لاہور (اُردو پوائنٹ اخبارتازہ ترین - این این آئی۔ 02 جولائی2025ء) عوامی رکشہ یونین کے زیر اہتمام پٹرولیم مصنوعات کی قیمتوں میں ہوشربا اضافے اور مہنگائی کے خلاف پریس کلب کے سامنے احتجاجی مظاہرہ کیا گیا ۔ مظاہرین نے بینرز اور پلے کارڈز اٹھا رکھے تھے جن پر حکومت مخالف نعرے درج تھے اور غریب عوام کے لیے ریلیف کا مطالبہ کیا گیا ۔اس موقع پر خطاب کرتے ہوئے مرکزی چیئرمین مجید غوری نے کہا کہ پٹرول کی قیمتوں میں حالیہ اضافہ رکشہ ڈرائیوروں کے لیے معاشی تباہی کا پیغام ہے۔

چالانوں کاٹارگٹ پورا کرنے والے پریشر نے ٹریفک پولیس کو بد اخلاق بنا دیا ہے۔ سابق سی ٹی او کیپٹن مبین شہید نے اپنا خون دے کر اسے شہداء کی فورس بنایا تھا موجودہ سی ٹی او اطہر وحید نے اسے چالان ناکوں کی پولیس بنادیا۔

(جاری ہے)

جہاں غریب رکشہ ڈرائیوروں کی ساری کمائی چھین لی جاتی ہے۔ احتجاج پر جھوٹے پرچے دیئے جاتے ہیں۔ ہمیں تو مہنگائی نے خود کشیوں پر مجبو ر کر رکھا ہے۔

انہوںنے کہا کہ آج پٹرول مہنگا ہوگیا۔ کبھی بجلی مہنگی کردی جاتی ہے، کبھی گیس کی قیمتوںمیں اضافہ کردیا جاتاہے،اشیاء خوردو نوش کی قیمتوں میں بے لگام اضافہ ہوتا جارہا ہے ہماری توساری کمائی ان لوازمات کو پورے کرتے کرتے لٹ جاتی ہے۔50درجہ حرارت کی گرمی آگ اگلتے انجن پر بیٹھ کر ایک ہزار سے 1300روپے کمانے والا رکشہ ڈرائیور روز جیتا ہے اور روز مرتاہے۔

مجید غوری کا کہنا تھا کہ پہلے ہی مہنگائی آسمان سے باتیں کر رہی ہے، اب پٹرول مزید مہنگا کر کے عوام کی کمر توڑ دی گئی ہے۔''انہوں نے کہا کہ رکشہ ڈرائیوروں کو ناجائز چالانوں کا نشانہ بنایا جا رہا ہے، اور جب وہ احتجاج کرتے ہیں تو ان پر جھوٹے مقدمات درج کیے جاتے ہیں۔ انہوں نے بجلی اور گیس کی قیمتوں میں اضافے پر بھی شدید تنقید کی، اور کہا کہ ''بجلی کے بلوں میں 200 اور 201 یونٹ کا کھیل جاری ہے، غریبوں کی جیبوں پر ہر طرف سے ڈاکے ڈالے جا رہے ہیں، جب کہ اشرافیہ کو تمام سہولیات مفت میں فراہم کی جا رہی ہیں۔

''مجید غوری نے سوال اٹھایا کہ اگر ملک میں واقعی مہنگائی نہیں ہے تو وزیروں، مشیروں اور اراکین اسمبلی کی تنخواہوں میں کئی سو گنا اضافہ کیوں کیا گیا ہی انہوں نے حکومت سے مطالبہ کیا کہ پٹرولیم مصنوعات کی قیمتوں میں فوری کمی کی جائے، جھوٹے چالان اور مقدمات کا سلسلہ بند کیا جائے اور عام شہریوں کو ریلیف فراہم کیا جائے۔مظاہرے میں بڑی تعداد میں رکشہ ڈرائیوروں نے شرکت کی اور حکومت کی معاشی پالیسیوں کے خلاف نعرے بازی کی۔ مقررین نے خبردار کیا کہ اگر فوری اقدامات نہ کیے گئے تو احتجاج کا دائرہ بڑھا دیا جائے گا۔