شہید برہان مظفر وانی نے تحریک آزادی کو ایک نئی سمت دی،ملک محمد اسحاق

پیر 7 جولائی 2025 17:01

ابوظہبی (اُردو پوائنٹ اخبارتازہ ترین - این این آئی۔ 07 جولائی2025ء)صدر پاکستان پیپلزپارٹی پالیسیز ومنصوبہ بندی خلیج ومشرق وسطی ملک محمد اسحاق نے معروف کشمیری رہنما،تحریک آزادی کشمیر کے ہیرو شہید برہان مظفر وانی کو ان کے یوم شہادت شہادت کے موقع پر شاندار خراج عقیدت پیش کیا ہے۔اپنے خصوصی بیان میں ملک محمد اسحاق نے کہا کہ شہید برہان مظفر وانی مقبوضہ جموں وکشمیر کا ایک عظیم بیٹا تھا جس نے بے مثال بہادری،لگن اور انتھک محنت سے تحریک آزادی کشمیر میں ایک نئی روح پھونکی۔

شہید برہان مظفر وانی کو اپنے مشن کے ساتھ جنون کی حد تک عشق تھا جسکی بدولت اس نے بالآخر شہادت کا عظیم رتبہ پا لیا۔ان کا کہنا تھا کہ شہید برہان مظفر وانی نے تحریک آزادی کو ایک نئی سمت دی،وہ ایک نڈر، بیباک اور تعلیم یافتہ نوجوان تھا جس میں چھوٹی عمر سے ہی قائدانہ صلاحتیں موجود تھیں اور وہ آخر کار تحریک آزادی میں ایک نیا باب رقم کر گیا۔

(جاری ہے)

انھوں نے مزید کہا کہ کشمیریوں کی آزادی کی جدوجہد ایک زندہ حقیقت ہے کشمیریوں کی بے مثال قربانیوں کا نیتجہ ہے کہ مسئلہ کشمیر اس وقت عالمی سطح پر توجہ کا مرکز ہے کشمیری عوام بھارت کو مسترد کر چکے ہیں تنازعہ کشمیر کاسہ فریقی مذاکرات کے ذریعے ہی پائیدار حل تلاش کیا جاسکتا ہے۔انھوں نے کہا کہ شہدائکی قربانیاں تحریک آزادی کا ایک قیمتی اثاثہ ہیں کشمیریوں کا فرض ہے کہ وہ اس اثاثے کی حفاظت کریں اور بھارت کے خلاف اپنی مزاحمت مقصد کے حصول تک جاری رکھیں۔