برہان مظفر وانی شہید مقبوضہ جموں وکشمیر کی تحریک آزادی کا وہ درخشندہ ستارہ ہے،راجہ شبیر احمد

انشاء اللہ بہت جلد مقبوضہ جموں وکشمیر آزاد ہو کر پاکستان کا حصہ بنے گا اور برہان مظفر وانی شہید کا خواب پورا ہو گا

منگل 8 جولائی 2025 16:11

لندن(اُردو پوائنٹ اخبارتازہ ترین - این این آئی۔ 08 جولائی2025ء)پاکستان پیپلزپارٹی برطانیہ کے رہنما راجہ شبیر احمد نے کہا ہے کہ برہان مظفر وانی شہید مقبوضہ جموں وکشمیر کی تحریک آزادی کا وہ درخشندہ ستارہ ہے جو کشمیر سمیت دنیا بھر میں آزادی اور حریت کے لیے بر سرپیکار نوجوانوں کے ہیرو اور رول ماڈل بن چکے ہیں برہان مظفر وانی شہید نے اپنے جان کا نذرانہ پیش کر کے تحریک آزادی کشمیر کو نئے مہمیز اور جہت عطا کی اور کشمیری نوجوانوں کے اندر ایسا جذبہ پیدا کیا کہ آج اُن میں سے ہر ایک برہان مظفر وانی بننا چاہتا ہے ان خیالات کا اظہار انھوں نے برہان مظفر وانی کے نویں یوم شہادت پر میڈیا سے گفتگو کرتے ہوئے کیا انھوں نے کہا کہ برہان مظفر وانی کی شہادت کے بعد مقبوضہ جموں وکشمیر کے لوگ جس عزم و ہمت کے ساتھ بھارتی مظالم کا مقابلہ کر رہے ہیں وہ بھارت کے مکروہ عزائم بالخصوص موجودہ حکمران جماعت اور بھارتی وزیراعظم نریندرمودی کے فلسفہ ہندتوا کا ایک منہ توڑ جواب ہے۔

(جاری ہے)

انھوں نے کہا کہ برہان مظفر وانی کا یوم شہادت ساری دنیا کو یہ پیغام دے رہا ہے کہ اگر مقبوضہ جموں وکشمیر میں ظلم کا یہ بازار گرم رہا،انسانی حقوق کی اس وسیع پیمانے پر خلاف ورزی ہوتی رہی،سرعام کشمیریوں پر ظلم وستم کیا جاتا رہا ہے تو پھر دنیا میں امن کی ضمانت نہیں دی جا سکتی۔ان کا کہنا تھا کہ برہان مظفر وانی مقبوضہ جموں وکشمیر کی جدوجہد آزادی کی علامت بن گئے،ان کی برسی کے موقع پر ہم عہد کرتے ہیں کہ تحریک آزادی کشمیر کی کامیابی کے لئے اپنی تمام تر توانائیاں صرف کریں گے انشاء اللہ بہت جلد مقبوضہ جموں وکشمیر آزاد ہو کر پاکستان کا حصہ بنے گا اور برہان مظفر وانی شہید کا خواب پورا ہو گا۔