چیئرمین سی ڈی اے سے بلغاریہ کی سفیر ایرینا گانچیوا کی ملاقات، باہمی دلچسپی کے امور پر تبادلہ خیال

منگل 8 جولائی 2025 20:20

اسلام آباد (اُردو پوائنٹ اخبارتازہ ترین - اے پی پی۔ 08 جولائی2025ء) اسلامی جمہوریہ پاکستان میں بلغاریہ کی سفیر ایرینا گانچیوا نے چیئرمین سی ڈی اے محمد علی رندھاوا سے سی ڈی اے ہیڈکوارٹرز میں ملاقات کی۔ یہ ملاقات نہایت خوشگوار ماحول میں ہوئی جس میں باہمی دلچسپی کے امور پر تبادلہ خیال کیا گیا، خصوصاً ادارہ جاتی تعاون کو فروغ دینے اور دوطرفہ روابط کو مضبوط بنانے پر زور دیا گیا۔

ایرینا گانچیوا نے چیئرمین سی ڈی اے/ چیف کمشنر اسلام آباد /ڈی جی سول ڈیفنس محمد علی رندھاوا کی قیادت میں دارالحکومت کی ترقی، خوبصورتی اور ماحولیاتی پائیداری کو برقرار رکھنے کے لیے سی ڈی اے کی اہم کوششوں اور اقدامات کو سراہا۔ محمد علی رندھاوا نے کہا کہ سی ڈی اے اسلام آباد کو مزید ترقی یافتہ اور خوبصورت بنانے کے لیے پرعزم ہے۔

(جاری ہے)

بلغاریہ کی سفیر ایرینا گانچیوا نے شہر کی ترقی، خوبصورتی اور ماحول دوست درخت لگانے کے لیے سی ڈی اے کی شاندار کوششوں کو سراہا۔

ملاقات کے اختتام پر چیئرمین سی ڈی اے محمد علی رندھاوا نے جمہوریہ بلغاریہ کے ساتھ باہمی تعلقات کو مضبوط بنانے کے پاکستان کے عزم کا اعادہ کیا جبکہ بلغاریہ کی سفیر نے بھی تعاون کو فروغ دینے میں بھرپور مدد کی یقین دہانی کرائی اور سی ڈی اے کے ساتھ قریبی شراکت داری میں کام کرنے کی بلغاریہ کی خواہش کا اظہار کیا۔