ویرات کوہلی کا ومبلڈن ٹینس اور پاک بھارت کرکٹ میچ کے درمیان دلچسپ موازنہ

کرکٹ اسٹیڈیمز میں دباؤ اتنا خوفناک محسوس نہیں ہوتا، سابق بھارتی کپتان

ذیشان مہتاب بدھ 9 جولائی 2025 13:59

ویرات کوہلی کا ومبلڈن ٹینس اور پاک بھارت کرکٹ میچ کے درمیان دلچسپ موازنہ

لندن (اردو پوائنٹ تازہ ترین اخبار ۔ 9 جولائی 2025ء ) سابق بھارتی کپتان ویرات کوہلی نے ومبلڈن ٹینس اور پاک بھارت کرکٹ میچ کے درمیان دلچسپ موازنہ کردیا۔

سابق بھارتی کپتان نے پیر کو ومبلڈن میں سربیا کے نوواک جوکووچ اور آسٹریلیا کے ایلکس ڈی مینورکے درمیان ہونے والا مینز راؤنڈ آف 16 کا میچ دیکھا۔

اس موقع پر ویرات کوہلی کا کہنا تھا کہ سینٹر کورٹ کا ماحول اور ہر پوائنٹ پر پڑنے والا دباؤ بعض اوقات بڑے کرکٹ میچز سے بھی زیادہ شدید محسوس ہوتا ہے۔

سٹار سپورٹس سے گفتگو کرتے ہوئے ویرات کوہلی نے کہا کہ کرکٹ اسٹیڈیمز میں دباؤ ہوتا ہے لیکن وہ اتنا خوفناک محسوس نہیں ہوتا۔ جب آپ بیٹنگ کر رہے ہوتے ہیں تو شور، نعرے یا تنقید براہ راست سنائی نہیں دیتی۔ اصل دباؤ صرف فیلڈنگ کے دوران باؤنڈری کے قریب آتا ہے۔

(جاری ہے)

انہوں نے ٹینس کی شدت اور کھلاڑیوں کی ذہنی و جسمانی مضبوطی کی تعریف کرتے ہوئے کہا کہ ٹینس میں ہر پوائنٹ پر سب کچھ داؤ پر ہوتا ہے، ایک لمحہ پورا میچ بدل سکتا ہے، یہاں دباؤ بہت شدید ہوتا ہے، میں ان کھلاڑیوں کے حوصلے اور فٹنس کو داد دیتا ہوں۔

ویرات کوہلی نے کہا کہ کرکٹ میں صرف کچھ ہی میچز ایسے ہوتے ہیں جہاں ایسا ہی دباؤ محسوس ہوتا ہے جیسا کہ ورلڈ کپ میں پاکستان اور بھارت کا میچ جہاں سیمی فائنل یا فائنل جیسا دباؤ شاید ہی کسی اور میچ میں محسوس ہو، اس وقت آپ کے پاؤں واقعی کانپ رہے ہوتے ہیں، ٹینس کھلاڑیوں کو ایسا دباؤ کوارٹر فائنل سے ہی جھیلنا پڑتا ہے۔

یاد رہے کہ ویرات کوہلی نے حال ہی میں ٹی 20 انٹرنیشنل کرکٹ سے ریٹائرمنٹ کا اعلان کیا تھا جس میں وہ 2024ء کے ٹی 20 ورلڈکپ کے فائنل میں پلیئر آف دی میچ بھی رہے۔ مئی 2025ء میں وہ ٹیسٹ کرکٹ سے بھی ریٹائر ہو چکے ہیں تاہم ون ڈے فارمیٹ میں وہ دستیاب رہیں گے۔