Live Updates

کالا باغ ڈیم بھاڑ میں جائے، ہمیں چھوٹے ڈیم بنانے چاہئیں : شاہد آفریدی

ہمیں ماضی میں نہیں رہنا اس سے سیکھ کر آئندہ کے لیے ٹھوس فیصلے کرنا ہوں گے : سابق کپتان

ذیشان مہتاب جمعرات 11 ستمبر 2025 11:08

کالا باغ ڈیم بھاڑ میں جائے، ہمیں چھوٹے ڈیم بنانے چاہئیں : شاہد آفریدی

لاہور (اردو پوائنٹ تازہ ترین اخبار ۔ 11 ستمبر 2025ء ) پاکستان کرکٹ ٹیم کے سابق کپتان و سماجی رہنما شاہد خان آفریدی نے ملک میں جاری موسمی اور ماحولیاتی چیلنجز پر گہری تشویش کا اظہار کرتے ہوئے کہا ہے کہ ہمیں ماضی میں نہیں رہنا بلکہ اس سے سیکھ کر آئندہ کے لیے ٹھوس فیصلے کرنا ہوں گے۔

نجی ٹی وی پروگرام میں گفتگو کرتے ہوئے 48 سالہ شاہد آفریدی نے کہا کہ ہمیں اپنی نسلوں کا سوچنا ہوگا اور اس طرح نہیں چلے گا، ہمیں ڈیمز بنانے اور درخت لگانے جیسے اقدامات کرنے ہوں گے۔

شاہد آفریدی نے سوال اٹھایا کہ پہاڑ اور درخت کاٹ دیئے گئے ہیں، ہم کیا کر رہے ہیں ۔

انہوں نے کالاباغ ڈیم کی مخالفت کرتے ہوئے کہا کالاباغ ڈیم بھاڑ میں جائے، ہمیں چھوٹے ڈیم بنانے چاہئیں جو حقیقت میں ملک کی ضرورت کو پورا کریں۔

(جاری ہے)

شاہد آفریدی نے کہا کہ سیلاب کی حالیہ تباہ کاریوں سے بونیر، صوابی اور باجوڑ شدید متاثر ہوئے ہیں۔

صوابی میں ریسکیو کا کام مکمل ہو چکا ہے لیکن ریلیف اور بحالی کا کام ابھی باقی ہے۔

انہوں نے کہا کافی لوگوں کی آنکھوں میں آنسو خشک ہوگئے تھے، اگلی بار اس سے بھی زیادہ خطرناک صورتحال ہو سکتی ہے، ہمیں کسی بڑے حادثے سے پہلے اقدامات کرنا ہوں گے، ہم ملک کیلئے کب فیصلے کریں گے ۔

اس سے قبل اسلام آباد میں ایک تقریب سے خطاب میں قومی کرکٹ ٹیم کے سابق کپتان اور جارح مزاج بلے باز شاہد آفریدی نے کہا ہے کہ ملک میں سیلاب کی تباہ کُن صورتحال ہے، ایسے میں حکومتوں کو کاروبار نہیں بلکہ لوگوں کی خدمت پر توجہ دینے کی ضرورت ہے۔

سابق کپتان شاہد آفریدی کا کہنا تھا کہ میں نے خود تباہ کن سیلاب کے دوران ماؤں، بچوں اور جانوروں کی تکالیف کو دیکھا ہے۔

سابق کپتان نے کہا کہ میں نے بچوں اور جانوروں کو ایک ہی جگہ سے پانی پینے پر مجبور ہوتے دیکھا اور لوگوں کو 10 کلومیٹر پیدل چل کر برتنوں میں پانی لاتے ہوئے دیکھا۔

انہوں نے حکومت اور عوام اپیل کی کہ سیلاب متاثرین سے ملیں، ان کو گلے لگائیں اور اس مشکل وقت میں ان کا سہارا بنیں۔

پاکستان کے سابق آل راؤنڈر نے کہا کہ میں بولتا کم ہوں کام زیادہ کرتا ہوں، میں کرکٹ کیریئر کے آغاز میں اپنے لیے کھیلتا تھا لیکن زندگی میں ایک وقت ایسا ضرور آتا ہے جب ہمیں دوسروں کے لیے اٹھنا پڑتا ہے اور اب ہم اس سفر پر گامزن ہیں۔

انہوں نے کہا کہ میں سب سے کہتا ہوں کہ وہ بھی سیلاب متاثرین کی مدد کے لیے ہمارا ساتھ دیں۔