Live Updates

ایشیاء کپ: پاکستان سے میچ پر پابندی کی درخواست، بھارتی سپریم کورٹ نے بڑا فیصلہ دیدیا

پاکستان اور بھارت کی ٹیموں کے درمیان میچ 14 ستمبر کو دبئی میں شیڈول ہے

ذیشان مہتاب جمعرات 11 ستمبر 2025 12:23

ایشیاء کپ: پاکستان سے میچ پر پابندی کی درخواست، بھارتی سپریم کورٹ نے ..

نئی دہلی (اردو پوائنٹ تازہ ترین اخبار ۔ 11 ستمبر 2025ء ) ایشیا کپ 2025 کے شیڈول کا اعلان ہونے کے بعد سے بھارتی شدت پسند حلقوں کی جانب سے پاک بھارت میچ کی مخالفت جاری ہے۔

بھارتی میڈیا کے مطابق پاک بھارت میچ کی مخالفت حد سے بڑھتے ہوئے گزشتہ روز بھارتی سپریم کورٹ تک جا پہنچی جہاں میچ پر پابندی کے لیے درخواست دائر کردی گئی۔

درخواست میں 14 ستمبر کو بھارت اور پاکستان کے درمیان ہونے والے ایشیا کپ کرکٹ میچ پر پابندی لگانے اور اسے غیر آئینی قرار دینے کی استدعا کی گئی ۔

یہ درخواست پونے کے سماجی کارکن کیتن تیرودکر کی جانب سے دائر کی گئی، جس میں مؤقف اختیار کیا گیا ہے کہ دونوں ممالک کے درمیان حالیہ جنگ کے پیش نظر بھارت اور پاکستان کے درمیان میچز نہیں کھیلے جانے چاہئییں۔

(جاری ہے)

درخواست میں کہا گیا ہے کہ یہ میچ آئین کے آرٹیکل 21 کی خلاف ورزی ہے، جو بھارتی شہریوں کے لیے زندگی اور ذاتی آزادی کے حق کی ضمانت دیتا ہے۔

تاہم جسٹس جے کے مہیشوری اور وجے بشنوئی پر مشتمل بنچ نے اس معاملے کی سماعت کرنے سے بھی انکار کر دیا۔

انہوں نے ریمارکس میں صرف اتنا کہا کہ ’یہ صرف ایک میچ ہے‘۔

واضح رہے کہ گزشتہ دنوں بھارت کے ایشیاکپ میں پاکستان کے ساتھ کھیلنے پربھارتی کرکٹ بورڈ کی جانب سے وضاحت سامنے آئی تھی۔ بھارتی کرکٹ بورڈ کے سیکرٹری دیوجیت سائیکیا نے پاکستان کے ساتھ کھیلنےکی پالیسی کے حوالے سے کہا تھا کہ ہم مرکزی حکومت کو فالو کرتے ہیں، بھارت کی حالیہ پالیسی کے مطابق انٹرنیشنل ٹورنامنٹس میں بھارتی ٹیم کی شرکت پر پابندی نہیں۔

سیکرٹری بی سی سی آئی دیوجیت سائیکیا کا کہنا تھا کہ جہاں تک بی سی سی آئی کے مؤقف کا تعلق ہے، ہمیں وہی فالو کرنا پڑتا ہے جو مرکزی حکومت طے کرتی ہے، بھارت کی حالیہ نئی پالیسی کسی بھی کثیرالملکی یا بین الاقوامی ٹورنامنٹ میں شرکت سے متعلق نہیں روکتی۔

اس سے قبل بھارتی میڈیا نے اپنے بورڈ اور حکومت کو آڑے ہاتھوں لیا تھا۔ ورلڈ چیمپئنز لیگ کی طرح ایشیا کپ میں بھی پاکستان کے خلاف میچ کا بائیکاٹ کرنے کا مطالبہ کیا گیا۔

علاوہ ازیں سابق بھارتی کھلاڑیوں کی جانب سے بھی پاکستان کے خلاف کھیلنے کے فیصلے کو تنقید کا نشانہ بنایا گیا۔

واضح رہے کہ ایشیا کپ میں پاکستان اور بھارت گروپ اے میں شامل ہیں اور دونوں کے درمیان گروپ میچ 14 ستمبر کو دبئی میں کھیلا جائے گا۔