شوگر سیکٹر میں گٹھ جوڑ اور کارٹل کے الزامات پر 44ارب روپے جرمانے کاکیس دوبارہ سماعت کیلئے مقرر

بدھ 9 جولائی 2025 23:05

لاہور(اُردو پوائنٹ اخبارتازہ ترین - این این آئی۔ 09 جولائی2025ء)مسابقتی کمیشن آف پاکستان نے شوگر سیکٹر میں گٹھ جوڑ اور کارٹل کے الزامات پر 44ارب روپے جرمانے کے کیس کو دوبارہ سماعت کیلئے مقرر کر دیا ،مسابقتی کمیشن 4سے 7اگست 2025تک سماعت کرے گا ۔

(جاری ہے)

مسابقتی کمیشن نے شوگر ملوں کے مالکان اور شوگر ملز ایسوسی ایشن کو باقاعدہ نوٹسز جاری کر دئیے ہیں جن میں انہیں ہدایت کی گئی ہے کہ وہ اپنے وکیل نامزد کریں اور تمام شواہد و دستاویزات ساتھ لائیں۔

یہ کیس اس وقت دوبارہ کھولا گیا ہے جب مسابقتی ٹربیونل نے معاملہ کمیشن کو واپس بھیجتے ہوئے ہدایت کی کہ 90دن کے اندر اس پر فیصلہ سنایا جائے۔یاد رہے کہ 2021ء میں مسابقتی کمیشن نے شوگر ملز ایسوسی ایشن اور مختلف شوگر ملز مالکان پر مجموعی طور پر 44ارب روپے جرمانہ عائد کیا تھا، جس کے بعد متعلقہ فریقین نے عدالت سے حکمِ امتناع حاصل کر لیا تھا۔