Live Updates

احتجاج کےلئے حالات نامناسب، مجھے علم ہے قاسم اور سلیمان نہیں آئیں گے. شیرافضل مروت

عمران خان کے بچوں کو اس بات پر جھونکا جارہا ہے کہ لوگ زیادہ آئیں گے تو ان کی اپروچ غلط ہے ،پی ٹی آئی رہنما بیمار پڑنا شروع ہوگئے ہیں، ان سے تحریک کی توقع نہیں ہے. رکن قومی اسمبلی کی گفتگو

میاں محمد ندیم جمعہ 11 جولائی 2025 14:49

احتجاج کےلئے حالات نامناسب، مجھے علم ہے قاسم اور سلیمان نہیں آئیں گے. ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔11 جولائی ۔2025 )رکن قومی اسمبلی شیرافضل مروت نے کہا ہے کہ مجھے علم ہے کہ عمران خان کے بیٹے قاسم اور سلیمان نہیں آئیں گے، اس وقت حالات احتجاج کےلئے بالکل نامناسب ہیں ایک انٹرویو میں شیرافضل مروت نے کہا کہ پارٹی راہنماﺅ ں کو عمران خان کے بیٹوں پر رحم کرنا چاہیے، پی ٹی آئی کا ہر لیڈر کہہ رہا ہے قاسم اور سلیمان تحریک جوائن کریں گے، پی ٹی آئی لیڈر اس طرح کی باتیں کرکے کارکنوں کو امید دلا رہے ہیں.

(جاری ہے)

شیرافضل مروت نے کہا کہ پی ٹی آئی کا ورکر عمران خان کو لیڈر مانتا ہے، رشتہ دار لیڈر نہیں ہوسکتے، عمران خان کے بچوں کو اس بات پر جھونکا جارہا ہے کہ لوگ زیادہ آئیں گے تو ان کی اپروچ غلط ہے انہوں نے کہا کہ چاہے کچھ بھی ہوجائے اس وقت حالات احتجاج کےلئے بالکل نامناسب ہیں، میں نہیں دیکھ رہا کہ احتجاج ہوگا اور لوگ نکلیں گے. شیرافضل نے کہا کہ آنے والا محرم بھی گزر جائےگا، پی ٹی آئی رہنما ہسپتالوں میں لیٹ گئے ہیں، پی ٹی آئی رہنما بیمار پڑنا شروع ہوگئے ہیں، ان سے تحریک کی توقع نہیں ہے انہوں نے کہا عمران خان کو سب اچھا ہے کی رپورٹ دی جاتی ہے حقیقت نہیں بتائی جاتی، سابق وزیراعظم کو رپورٹ دی جاتی ہے کہ لوگ باہر نکلنے کےلئے دیوانے ہیں، انہیں حقیقت نہیں بتائی جاتی کہ ملک میں کیا ہورہا ہے، ورکر کی کیا پوزیشن ہے.

شیرافضل نے کہا کہ پی ٹی آئی راہنماﺅ ں نے قیادت کو خود مشکوک بنایا، سب کےخلاف فتوے دئیے، پی ٹی آئی کی موجودہ لیڈرشپ میں کونسی ایسی شخصیت ہے جس کے پیچھے عوام ہے؟انہوں نے کہا کہ جب ان راہنماﺅں کے پیچھے کوئی نکلنے کو تیار نہیں تو مزید ایسی کوئی مہم جوئی نہ کی جائے، اگر تحریک میں اسلام آباد نہیں جانا تو کیا چشمہ بیراج غوطے لگانے جانا ہے؟ تحریکوں میں اسلام آباد معنی رکھتا ہے اور یہی طاقت کا سرچشمہ ہے، میرے خیال سے یہ آخر میں انکشاف کریں گے کہ کوہاٹ میں دھرنا دینا ہے، اس وقت گرمی کا موسم ہے، جیلوں کے اندر بہت تپش ہے شیرافضل مروت نے کہا کہ پی ٹی آئی رہنما عام پاکستانیوں کو باہر نکالنے میں ناکام ہوئے ہیں، ان کا خیال ہے کہ انقلاب ٹوئٹراور گالیوں کے ذریعے آئے گا.