شہبازشریف کو میری ہائبرڈ نظام والی بات سے کوئی مسئلہ نہیں ہے

شہبازشریف سے شام کو بھی بات ہوئی باقی اِن لوگوں کو عتراض کرنے دیں،یہ ساری باتیں لوگوں کی اختراع ہے، مریم نواز بطور وزیراعلیٰ بہتر کام کررہی ہیں۔وزیردفاع خواجہ آصف

ثنااللہ ناگرہ جمعہ 5 ستمبر 2025 00:02

شہبازشریف کو میری ہائبرڈ نظام والی بات سے کوئی مسئلہ نہیں ہے

اسلام آباد ( اردوپوائنٹ اخبار تازہ ترین۔ آئی پی اے ۔ 04 ستمبر 2025ء ) وزیر دفاع خواجہ آصف نے کہا ہے کہ میاں نوازشریف موجودہ نظام حکومت کے تسلسل سے بالکل متفق ہیں، یہ کہنا غلط ہے کہ نوازشریف نظریات سے الگ ہوگئے ۔ انہوں نے جیو نیوز کے پروگرام میں گفتگو کرتے ہوئے کہا کہ مری کی میٹنگ میں تسلسل سے کوئی بات نہیں ہوئی۔میاں نوازشریف موجودہ نظام حکومت کے تسلسل سے بالکل متفق ہیں، اس وقت ووٹ کو عزت دوکی نہیں بلکہ اس وقت گورننس کی بات کرتے ہیں، میڈیا کو ان باتوں کا نہیں پتا ان کو یہ بھی نہیں پتا کہ میٹنگ میں کون کون موجود تھا، سیاسی نظریات کو عملی شکل میں لانے کا وقت آگے پیچھے ہوسکتا ہے، لیکن یہ کہنا غلط ہے کہ نوازشریف نظریات سے الگ ہوگئے ہیں۔

اس وقت ایک چیز چاہے وہ معاشی صورتحال ہے ، ڈپلومیسی ہے یا پھر جنگی صورتحال ہے کامیابی سے چل رہی ہے۔

(جاری ہے)

نوازشریف حکومت کی تیسری مدت کا اختتام جس طرح ہوا وہ ایک طے شدہ ایجنڈا تھا، اس میں جس طرح چیزیں ٹھیک ہورہی تھیں، سڑکیں بن رہی تھیں، سی پیک ، ایکسچینج ریٹ سب کچھ ٹھیک چل رہا تھا، اس وقت کی اسٹیبلشمنٹ کو مینیج کرتے رہتے تو میاں نوازشریف پانچ سال وزیراعظم رہتے اور آج پاکستان میں سیاسی صورتحال مختلف ہوتی۔

حکومت کا ٹارگٹ اس وقت ملک کا معاشی ، خارجہ پالیسی استحکام ہے، اور بھارت کے ساتھ معاملہ ہمارا ٹارگٹ ہے۔ ہم ماضی کی طرح صورتحال کو پید انہیں کرنا چاہتے، ہماری سمت کا تعین ہوچکا ہے ہمیں آگے بڑھنا ہے۔ شام کو شہبازشریف سے بات ہوئی ان کو میری بات پر اعتراض کرنے دیں۔ انہوں نے کہا کہ شہبازشریف کو میری ہائبرڈ نظام والی بات سے کوئی مسئلہ نہیں، مریم نواز میرے لیڈر کی بیٹی ہیں، وہ ہماری جماعت کا مستقبل ہیں، مریم نواز بطور وزیراعلیٰ بہتر کام کررہی ہیں، نوازشریف ، شہبازشریف اور مریم نواز کی کامیابی کیلئے دعا گو ہوں، ان کی کامیابی کیلئے اپنا حصہ بھی ڈال رہا ہوں ۔یہ ساری باتیں لوگوں کی اختراع ہے۔