سندھ حکومت کا سائوتھ ایشین کراٹے چیمپئن شپ میں شاندار کارکردگی دکھانے پرکھلاڑیوں کیلئے 6لاکھ روپے انعام کا اعلان

جمعہ 11 جولائی 2025 22:04

کراچی (اُردو پوائنٹ اخبارتازہ ترین - اے پی پی۔ 11 جولائی2025ء) سندھ حکومت نے سائوتھ ایشین کراٹے چیمپئن شپ میں شاندار کارکردگی دکھانے پرسندھ سے تعلق رکھنے والے کھلاڑیوں کیلئے 6لاکھ روپے انعام کا اعلان کیا جبکہ ناروے کپ 2025میں شرکت کیلئے جانے والی لیاری فٹبال اکیڈمی کی سٹریٹ چِلڈرن ٹیم کو ایک کروڑ 83لاکھ روپے کا اسپانسرشپ چیک فراہم کر دیاگیا ہے۔

جمعہ کو جاری اعلامیہ کے مطابق یہ اعلانات صوبائی وزیر کھیل سندھ سردار محمد بخش مہر نے کراچی میں کھلاڑیوں سے ملاقات کے موقع پر کیے۔ ملاقات میں سائوتھ ایشین کراٹے چیمپئن شپ میں پاکستان کیلئے تمغے جیتنے والے کھلاڑیوں نے شرکت کی، جنہوں نے اپنے میڈلز وزیر کھیل کو پیش کیے۔ پاکستانی ٹیم کی جانب سے نمایاں کارکردگی دکھانے والوں میں ایانا نوئل آرتھر 1گولڈ، ثمرہ اعجاز پراچہ 1برائونز، اریشہ ندیم 1سلور، 1برائونز، عبدالرحمن 3برائونز اور سحرش تصدیق 2برائونز شامل ہیں۔

(جاری ہے)

وزیر کھیل نے کہا کہ سندھ کے یہ نوجوان کھلاڑی ہمارا فخر ہیں، جنہوں نے عالمی سطح پر پاکستان کا نام روشن کیاہے۔انہوں نے کہاکہ سندھ حکومت کھیلوں میں خواتین کی شمولیت اور نوجوان ٹیلنٹ کی حوصلہ افزائی کے لیے ہر ممکن اقدامات کر رہی ہے۔ اس موقع پر لیاری فٹبال اکیڈمی کی سٹریٹ چِلڈرن ٹیم نے بھی وزیر کھیل سے ملاقات کی، جنہیں ناروے کپ 2025 میں شرکت کے لیے مالی معاونت دی گئی۔ ٹیم 26 جولائی سے 2اگست تک اوسلو، ناروے میں ہونے والے ٹورنامنٹ میں شرکت کرے گی۔ملاقات میں سیکرٹری کھیل عبدالعلیم لاشاری، ایڈیشنل سیکرٹری اسد اسحاق، اسسٹنٹ ڈائریکٹر فرید علی اور سندھ اولمپک ایسوسی ایشن کے عہدیداران احمد علی راجپوت، اصغر بلوچ سمیت دیگر حکام بھی شریک تھے۔