ڈپٹی چیئرمین سینیٹ سیدال خان کی زیر صدارت سینیٹ ہاؤس کمیٹی کا اجلاس

اسلام آباد (اُردو پوائنٹ اخبارتازہ ترین - اے پی پی۔ 11 جولائی2025ء) ڈپٹی چیئرمین سینیٹ سیدال خان کی زیر صدارت سینیٹ ہاؤس کمیٹی کا اجلاس جمعہ کو یہاں منعقد ہوا۔ کمیٹی اجلاس میں پارلیمنٹ لاجز کی مجموعی صورتحال، بنیادی سہولیات، مرمت و بحالی کے امور، اور 104 نئے سوئٹس کی تعمیر جیسے اہم معاملات کا تفصیل سے جائزہ لیا گیا۔سینیٹ سیکرٹریٹ کے مطابق کمیٹی نے پارلیمنٹ لاجز کی ناقص حالت، بالخصوص صفائی ستھرائی، دیکھ بھال کے فقدان اور روزمرہ سہولیات کی کمی پر گہری تشویش کا اظہار کیا۔

سینیٹر پونجو بھیل نے نشاندہی کی کہ ارکان پارلیمنٹ کو معمولی ضروریات جیسے بلب کی تبدیلی کے لئے بھی دشواریوں کا سامنا ہے جو انتظامی نااہلی کی عکاسی کرتا ہے۔اجلاس میں سینیٹر کامل علی آغا نے لاجز میں تعینات سی ڈی اے افسران کے غیر سنجیدہ اور غیر پیشہ ورانہ رویے پر شدید تحفظات کا اظہار کیا اور کہا کہ ارکان پارلیمنٹ کے ساتھ ایسا برتاؤ ہرگز قابلِ قبول نہیں۔

(جاری ہے)

سینیٹر خلیل طاہر سندھو نے سابق الاٹیز کی جانب سے بجلی کے واجبات کی عدم ادائیگی کا مسئلہ اٹھایا اور مطالبہ کیا کہ سی ڈی اے ان واجبات کی فوری وصولی یقینی بنائے۔وزیر مملکت برائے داخلہ سینیٹر طلال چوہدری نے کمیٹی کو یقین دلایا کہ وزارتِ داخلہ وزیراعظم شہباز شریف کی ہدایات اور سپیکر قومی اسمبلی کی مشاورت سے پارلیمنٹ لاجز میں اصلاحات کے لئے ہنگامی بنیادوں پر اقدامات کر رہی ہے۔

انہوں نے کہا کہ 104 نئے سوئٹس کی تعمیر اور دیگر مسائل کے حل کے لئے ٹھوس حکمتِ عملی اختیار کی گئی ہے۔وزارتِ خزانہ کے حکام نے بتایا کہ مالی سال 2025-26 میں پارلیمنٹ لاجز کی مرمت و دیکھ بھال کے لئے خاطر خواہ فنڈز مختص کئے گئے ہیں تاہم سی ڈی اے حکام کے مطابق گزشتہ دو سال کے واجبات کی ادائیگی میں تاخیر سے مرمتی کاموں میں رکاوٹ پیش آ رہی ہے۔

کمیٹی اجلاس میں فیصلہ کیا گیا کہ پارلیمنٹ لاجز کے تمام امور کی مؤثر نگرانی کے لئے سینیٹ ہاؤس کمیٹی کے اجلاس ہر ماہ باقاعدگی سے منعقد کئے جائیں گے۔ کمیٹی نے سینیٹ فنانس کمیٹی کی تجاویز کی روشنی میں سفارش کی کہ مرمت و دیکھ بھال کے لئے دیانتدار اور متحرک سی ڈی اے عملہ تعینات کیا جائے جبکہ غیر مؤثر اور طویل عرصے سے تعینات عملے کو فوری طور پر تبدیل کیا جائے۔

کمیٹی نے سابق ارکان کی جانب سے لاجز پر غیر قانونی قبضوں کا سختی سے نوٹس لیتے ہوئے ان رہائش گاہوں کو فی الفور خالی کرانے کی سفارش کی۔ کمیٹی نے اس امر پر بھی زور دیا کہ خواتین ارکان پارلیمنٹ کو دیئے گئے لاجز کی مرمت و دیکھ بھال کو ترجیحی بنیادوں پر یقینی بنایا جائے۔اجلاس میں سینیٹرز جان محمد، کامل علی آغا، پونجو بھیل، خلیل طاہر سندھو، وزیر مملکت برائے داخلہ سینیٹر طلال چوہدری، سپیشل سیکرٹری داخلہ وقاص علی محمود اور وزارتِ خزانہ و قانون کے اعلیٰ حکام نے شرکت کی۔