معطل ارکان کیخلاف ریفرنس،حکومت اور اپوزیشن کی مذاکراتی کمیٹیاں تشکیل

مذاکرتی کمیٹی کا دوسرا سیشن (کل )ہو گا، مذاکرات کامیاب ہونے پر سپیکر معطل ارکان کے ؤخلاف ریفرنس ڈارپ کر سکتے

ہفتہ 12 جولائی 2025 16:32

لاہور (اُردو پوائنٹ اخبارتازہ ترین - این این آئی۔ 12 جولائی2025ء) پنجاب اسمبلی میں اپوزیشن کے 26 معطل ارکان کے خلاف ریفرنس کے معاملے پر حکومتی اور اپوزیشن کی مذاکراتی کمیٹیاں تشکیل دے دی گئیں۔ذرائع کے مطابق سپیکر پنجاب اسمبلی ملک محمد احمد خان نے 8رکنی حکومتی کمیٹی تشکیل دی ۔ حکومتی مذاکراتی کمیٹی میں وزیر پارلیمانی امور مجتبیٰ شجاع الرحمن ، صوبائی وزیر خواجہ سلمان رفیق ، چیف وہپ رانا ارشد، سمیع اللہ خان ،احمد اقبال ،پیپلز پارٹی سے علی حیدر گیلانی،(ق) لیگ سے چودھری شافع حسین اور آئی پی پی سے شعیب صدیقی مذاکرتی کمیٹی میں شامل ہیں ۔

اپوزیشن کی جانب سے قائد حزب اختلاف ملک احمد خان بھچر مذاکراتی ٹیم کی قیادت کریں گے جبکہ دیگر ارکان میں علی امتیاز، شیخ امتیاز اور اعجاز شفیع شامل ہیں ۔

(جاری ہے)

اپوزیشن اور حکومتی اتحاد کی مذاکرتی کمیٹی کا دوسرا سیشن کل (اتوار )کو ہو گا، مذاکرات کامیاب ہونے پر سپیکر معطل ارکان کے خلاف ریفرنس ڈارپ کر سکتے ہیں۔واضح رہے کہ سپیکر پنجاب اسمبلی کی رولنگ کی خلاف ورزی پر اپوزیشن کے 26ارکان کو 15اجلاسوں کے لیے معطل کیا گیا تھا۔

اس حوالے سے سپیکر پنجاب اسمبلی ملک محمد احمد خان نے کہا تھا کہ ایوان میں ہنگامہ آرائی، نعرے، دھکم پیل اور دستاویزات پھاڑنے پر کارروائی کی گئی، ایوان کی حرمت اور نظم و ضبط کو ہر قیمت پر برقرار رکھا جائے گا، احتجاج کا حق تسلیم ہے لیکن اس کی حدود آئین، قانون اور قواعد کے تابع ہیں۔