1931 کے شہداء آج کی مزاحمت کے معمار ہیں، سینیٹر شیری رحمان کا شہدا کشمیر کو خراج عقیدت

اتوار 13 جولائی 2025 14:50

اسلام آباد (اُردو پوائنٹ اخبارتازہ ترین - اے پی پی۔ 13 جولائی2025ء) پاکستان پیپلز پارٹی کی نائب صدر سینیٹر شیری رحمان نے 13جولائی 1931کے شہدا کشمیر کو خراج عقیدت پیش کرتے ہوئے کہا ہے کہ 1931 کے شہداء آج کی مزاحمت کے معمار ہیں، پاکستان کشمیریوں کے حقِ خود ارادیت کی حمایت جاری رکھے گا۔ یوم شہدائے کشمیر کے موقع پر اپنے پیغام میں سینیٹر شیری رحمان نے کہا کہ 13 جولائی 1931 کو کشمیریوں نے ظلم کے خلاف علمِ بغاوت بلند کیا، شہداء کے خون نے آزادی کی موجودہ تحریک کو طاقت دی ہے۔

شیری رحمان نے کہا کہ بھارت کا جبر کشمیریوں کو ان کے حق سے نہیں روک سکتا۔ شیری رحمان نے کہا کہ ہندوتوا سرکار کشمیری شناخت مٹانے کے درپے ہے، پاکستان کشمیریوں کے حقِ خود ارادیت کی حمایت جاری رکھے گا۔

(جاری ہے)

انہوں نے کہا کہ مودی کی فسطائیت کو کشمیری نوجوان اپنے خون سے للکار رہے ہیں، کوئی قابض قوت کشمیریوں کے جذبے کو شکست نہیں دے سکتی۔ شیری رحمان نے کہا کہ اکستان پیپلز پارٹی کے دل بہادر کشمیری عوام کے ساتھ دھڑکتے ہیں۔

چیئرمین پیپلز پارٹی بلاول بھٹو نے دنیا بھر میں کشمیر کا مقدمہ بہادری سے لڑا ،صدر ٹرمپ کی اس مسلے کو حل کرنے کی پیشکش پاکستان کی بڑی کامیابی ہے۔ شیری رحمان نے کہا کہ وہ وقت دور نہیں کشمیری عوام کو حق خود ارادیت ملے گا اور مودی سرکار کو ایک اور محاذپر بد ترین شکست ہوگی۔