سعودی ایئرلائن کا 4 پاکستانی شہروں کیلئے پروازوں کا اعلان

پر ہفتہ وار 2 سے 3 پروازیں چلائی جائیں گی، تمام پروازیں جدید ایئر بس ای320 طیاروں پر آپریٹ کی جائیں گی

اتوار 13 جولائی 2025 15:15

سعودی ایئرلائن کا 4 پاکستانی شہروں کیلئے پروازوں کا اعلان

کراچی ( اُردو پوائنٹ اخبارتازہ ترین - این این آئی۔ 13 جولائی 2025ء ) سعودی عرب کی ایئرلائن فلائے اے ڈیل نے پاکستان کے لیے چار نئے فضائی راستوں کا اعلان کر دیا ہے جو اگست کے آخر میں فعال ہو جائیں گے، یہ اعلان فلائے اے ڈیل کی پاکستان میں تیزی سے بڑھتی ہوئی موجودگی کی علامت ہے۔ تفصیلات کے مطابق 24 سے 26 اگست کے درمیان شروع ہونے والی ان پروازوں کے تحت ریاض سے اسلام آباد، ریاض سے پشاور، ریاض سے سیالکوٹ اوردمام سے کراچی کے لیے ہفتہ وار 2 سے 3 پروازیں چلائی جائیں گی، یہ تمام پروازیں جدید ایئربس اے 320 طیاروں پر آپریٹ کی جائیں گی۔

یہاں قابلِ ذکر بات یہ ہے کہ ریاض سے سیالکوٹ کا راستہ اس وقت کسی بھی ایئرلائن کی طرف سے براہ راست فراہم نہیں کیا جا رہا، کیوں کہ پی آئی اے نے پچھلے سال یہ سروس بند کر دی تھی، اب فلائے اے ڈیل وہ واحد ایئرلائن ہوگی جو اس براہ راست فضائی رابطے کو بحال کر رہی ہے کیوں کہ پاکستان سعودی عرب کے لیے ایک تیزی سے بڑھتی ہوئی ایوی ایشن مارکیٹ بن چکا ہے۔

(جاری ہے)

بتایا گیا ہے کہ صرف سال 2024ء میں 59 لاکھ مسافر دونوں ممالک کے درمیان سفر کرنے والوں میں شامل تھے، اور ہر سال نشستوں کی تعداد میں بھی مسلسل اضافہ ہو رہا ہے، اسی کو مدنظر رکھتے ہوئے فلائے اے ڈیل نے فروری 2025ء میں جدہ اور ریاض سے کراچی کے لیے پروازوں کے ذریعے پاکستانی مارکیٹ میں قدم رکھا تھا اور اب نئے راستوں کے اضافے کے ساتھ اس کی خدمات میں دو گنا اضافہ ہو جائے گا۔