آزادی کی خاطر جانوں کا نذرانہ دینے والے 22 کشمیریوں کی یاد میں دنیا بھر میں یوم شہدائے کشمیر منایا گیا

اتوار 13 جولائی 2025 18:05

اسلام آباد (اُردو پوائنٹ اخبارتازہ ترین - این این آئی۔ 13 جولائی2025ء)مقبوضہ کشمیر کی آزادی کی خاطر جانوں کا نذرانہ دینے والے 22 کشمیریوں کی یاد میں دنیا بھر میں یوم شہدائے کشمیر منایا گیا، 13 جولائی 1931 کو ایک اذان کی تکمیل کیلئے 22 کشمیری مسلمانوں نے اپنی جانیں دیں لیکن ظلم کے آگے سر نہ جھکایا۔13 جولائی 1931 کو سرینگر سینٹرل جیل کے باہر قیدیوں کی رہائی کے لیے کیا گیا احتجاج عزم و ہمت کی لازوال داستان بن گیا، یہ شہادتیں اس جدوجہد کا آغاز تھیں جس نے کشمیر میں آزادی کی چنگاری کو شعلہ بنا دیا۔

احتجاج کے دوران ایک شخص نے اذان دینی شروع کی تو ڈوگرہ راج کے سپاہیوں نے اسے فائرنگ کرکے شہید کردیا تو دوسرا شخص اذان دینے لگا، ڈوگرہ سپاہیوں نے اسے بھی شہید کردیا، ایک کے بعد ایک کشمیری جان کی بازی ہارتا گیا مگر اذان مکمل کی گئی اور جب اذان کا آخری کلمہ ادا کیا گیا تو 22 کشمیری شہید ہوچکے تھے،ان شہدا کی یاد میں ہر سال کی طرح 13 جولائی کو یوم شہدائے کشمیر منایا جارہا ہے، اس سلسلے میں مقبوضہ کشمیر اور آزاد کشمیر سمیت دنیا بھر میں کشمیریوں کی جانب سے شہدا کی یاد میں ریلیاں نکالی جائیں گی اور دعائیہ تقاریب ہوں گی۔

(جاری ہے)

ملکی سیاسی قیادت نے یومِ شہدائے کشمیر کے موقع پر تحریک آزادی کے ساتھ ہمیشہ کھڑے رہنے کا عزم دہرادیا ہے، صدرمملکت آصف علی زرداری اور وزیراعظم شہباز شریف نے یوم شہدائے کشمیر کے موقع پر کشمیری شہدا کو خراج عقیدت پیش کیا ہے۔