Live Updates

پاکستان تحریک انصاف نے 5 اراکین قومی اسمبلی کو پارٹی سے نکال دیا

ان اراکین پر پارٹی ڈسپلن کی خلاف ورزی کرتے ہوئے 26 ویں ترمیم میں ووٹ دینے کا الزام تھا

ساجد علی اتوار 13 جولائی 2025 18:26

پاکستان تحریک انصاف نے 5 اراکین قومی اسمبلی کو پارٹی سے نکال دیا

اسلام آباد ( اُردو پوائنٹ اخبارتازہ ترین۔ 13 جولائی 2025ء ) پاکستان تحریک انصاف کی جانب سے 5 اراکین قومی اسمبلی کو پارٹی سے نکال دیا گیا۔ میڈیا رپورٹس کے مطابق پاکستان تحریک انصاف نے پارٹی ڈسپلن کی خلاف ورزی پر ایکشن لیتے ہوئے 26 ویں ترمیم میں ووٹ دینے والے ارکان قومی اسمبلی کو پارٹی سے برطرف کر دیا، اس حوالے سے چئیرمین پی ٹی آئی بیرسٹر گوہر نے نوٹی فکیشن جاری کر دیئے، جن کے تحت اورنگزیب خان کھچی، مبارک زیب خان، عثمان علی، ظہور قریشی اور الیاس چوہدری کو پارٹی سے نکال دیا گیا۔

علاوہ ازیں پی ٹی آئی رہنماء وزیراعلیٰ خیبرپختونخواہ علی امین گنڈا پور نے حکومت کو بانی پی ٹی آئی عمران خان کی رہائی کیلئے 90 دن کا الٹی میٹم دیتے ہوئے کہا کہ اب یا ہم نہیں یا تم نہیں، منزل حاصل کریں گے یا سیاست چھوڑ دیں گے، مولانا خود جعلی مینڈیٹ پر ہیں، عوام نے مولانا فضل الرحمان کو مسترد کیا، مولانا اپنے اندر تبدیلی لے آئیں تو بہت اچھا ہوگا، انہوں نے لوگوں کو گمراہ کیا ہے۔

(جاری ہے)

لاہور میں تقریب سے خطاب کرتے ہوئے انہوں نے کہا کہ ہمارے ارکان فعال نہ کیے تو ہم ان کے وہاں سارے فارغ کر دیں گے، ان کے جو اپوزیشن میں چیئرمین بنے ہوئے ہیں وہاں سب کو فارغ کردوں گا، پنجاب اسمبلی کے ارکان کو معطل کرنا لاقانونیت ہے، ہمارے مینڈیٹ پر پہلی بار ڈاکہ نہیں مارا گیا، 2013ء میں مینڈیٹ چوری کیا پھر 2018ء میں اکثریت کم کرنے کے لیے سسٹم بٹھایا گیا، عمران خان کا عزم ہے سیاست نہیں ملک کو ٹھیک کرنا ہے۔

علی امین گنڈاپور نے کہا کہ بانی پی ٹی آئی کہتے ہیں آؤ میں مذاکرات کیلئے تیار ہوں، عمران خان کہتے ہیں ثابت کر دو میں نے کوئی سازش کی ہے جو سزا دو گے مجھے قبول ہوگی، ہم نے تو جبر برداشت کیا ہے مگر آپ سے برداشت نہیں ہوگا، ناجائز کرو گے تو ناجائز ہم بھی کریں گے، ہمارا لیڈر بے گناہ جیل میں ہے، اس پر کوئی کیس نہیں ہے، لاہور میں جلسہ کرنا آئینی حق ہے، حکومت نے اجازت دی تو شکریہ کہوں گا، جلسہ کرنے دیا گیا تو تحفہ بھی دوں گا، خیبرپختونخواہ کا پنجاب سے موازنہ کریں گے تو یہ زیادتی ہوگی۔