حکمرانوں کے عوام کو مفت بجلی فراہم کرنے کے دعوے کہاں گئے، حافظ نعیم الرحمن

مہنگی ترین بجلی نے معیشت کا پہیہ جام اور عوام کا جینا محال کردیا ہے،فائدہ میں صرف حکمران اور شوگرمل مافیا ہے،امیرجماعت اسلامی

اتوار 13 جولائی 2025 19:40

حکمرانوں کے عوام کو مفت بجلی فراہم کرنے کے دعوے کہاں گئے، حافظ نعیم ..

لاہور(اُردو پوائنٹ اخبارتازہ ترین - این این آئی۔ 13 جولائی2025ء)امیر جماعت اسلامی حافظ نعیم الرحمن نے حکمرانوں کو قومی انتخابات کے دوران گھریلو صارفین کو مفت بجلی اور سستا پٹرول فراہم کرنے کے بلندو بانگ دعوے اور وعدے یاد دلاتے ہوئے سوال کیا ہے کیا ہے کہ اقتدار میں ڈیڑھ برس گزارنے کے باوجود عوام سے کیے گئے ان وعدوں کا کیا بنا ۔امیر جماعت اسلامی نے سماجی رابطوں کی ویب سائٹ ایکس پر مسلم لیگ (ن)، پیپلز پارٹی اور دیگر حکومتی پارٹیوں کے رہنماؤں کی انتخابی مہم کے دوران تین سو یونٹ تک مفت بجلی کرنے کی ویڈیو جاری کی ہے۔

ویڈیو میں پی پی چیئرمین بلاول بھٹو زرداری، ان کی بہن آصفہ بھٹو زرداری، وزیراعلی پنجاب مریم نواز عوام سے ووٹ دینے کی اپیل کرتے ہوئے وعدے کررہے ہیں کہ وہ اقتدار میں آکر بالترتیب تین سو اور دوسو یونٹس تک بجلی مفت کردیں گے، اسی طرح وفاقی وزیر علیم خان بھی جلسہ گاہ میں مفت بجلی فراہم کرنے اور پٹرول کی قیمت آدھی کرنے کے دعوے کرتے سنے جاسکتے ہیں۔

(جاری ہے)

حافظ نعیم الرحمن نے ایکس پر اظہار خیال کرتے ہوئے کہا کہ ان کے مفت بجلی کے دعوے اور وعدے کہاں گئے۔ آج مہنگی ترین بجلی نے معیشت کا پہیہ جام اور عوام کا جینا محال کردیا ہے۔ فائدہ میں صرف حکمران اور ان کی شوگرمل مافیا رہا۔ انہوں نے مزید کہا کہ حکمران طبقہ کے علاوہ عوام، کسان اور صنعت کار سب خسارے میں ہیں۔