پاکستان اور انڈونیشیا کے مابین مشترکہ ثقافت، مذہب اور تاریخی رشتوں کی بنیاد پر دیرینہ دوستانہ تعلقات استوار ہیں ،وزیراعظم شہباز شریف کی انڈونیشیا کے وزیر دفاع سے ملاقات میں گفتگو

اسلام آباد (اُردو پوائنٹ اخبارتازہ ترین - اے پی پی۔ 15 جولائی2025ء) وزیراعظم محمد شہبازشریف نے انڈونیشیا کے ساتھ اقتصادی و تزویراتی تعلقات اور تجارت، دفاع ودفاعی پیداوار سمیت تمام شعبوں میں دو طرفہ تعاون کو مزید فروغ دینے کے عزم کا اعادہ کرتے ہوئے کہا ہے کہ پاکستان اور انڈونیشیا کے مابین مشترکہ ثقافت، مذہب اور تاریخی رشتوں کی بنیاد پر دیرینہ دوستانہ تعلقات استوار ہیں اور دونوں ممالک بین الاقوامی فورمز پر ایک دوسرے کی حمایت کرتے ہیں۔

وزیراعظم آفس کے میڈیا ونگ کی طر ف سے جاری بیان کے مطابق ان خیالات اظہار انہوں نے انڈونیشیا کے وزیر دفاع لیفٹیننٹ جنرل (ر)سیافری سمسودین سے گفتگوکرتے ہوئے کیا جنہوں نے منگل کو یہاں ان سے ملاقات کی۔ وزیراعظم نے انڈونیشیا کے صدر پرابووو سوبیانٹو کے ساتھ قاہرہ میں جی ایٹ سربراہی اجلاس کے موقع پر اپنی خوشگوار ملاقات کی یاد وں کا تذکرہ کرتے ہوئے ان کےلئے نیک خواہشات کا اظہار کیا۔

(جاری ہے)

ملاقات میں پاکستان اور انڈونیشیا کےمابین گہرے تاریخی، برادرانہ اور دوستانہ دوطرفہ تعلقات پر گفتگو کی گئی۔وزیراعظم نے کہا کہ پاکستان اور انڈونیشیا کے درمیان مشترکہ ثقافت، مذہب اور تاریخی رشتوں پر مبنی دیرینہ دوستانہ تعلقات ہیں اور دونوں ممالک بین الاقوامی فورمز پر ایک دوسرے کی حمایت کرتے ہیں۔وزیراعظم نے پاکستان کے انڈونیشیا کے ساتھ اقتصادی و تزویراتی تعلقات اور تجارت، دفاع اور دفاعی پیداوار کے شعبوں سمیت تمام شعبوں میں دو طرفہ تعاون کو مزید فروغ دینے کے عزم کا اعادہ کیا۔

ملاقات کے دوران دونوں رہنماؤں نے کثیر الجہتی دوطرفہ تعاون کو بڑھانے کی اہمیت پر زور دیا۔ وزیر اعظم شہباز شریف نے باہمی طور پر مفید منصوبوں میں سرمایہ کاری کے لئے انڈونیشیا کے ساتھ تعاون کو مزید فروغ دینے پر زور دیا۔وزیر اعظم نے پاکستان اور انڈونیشیا کے مابین دفاعی تعاون کے معاہدے کے تحت جاری اقدامات کا بھی جائزہ لیا ۔ دونوں رہنماؤں نے اس معاہدے کے نفاذ کو تیز کرنے پر اتفاق کیا۔

لیفٹیننٹ جنرل (ر) سیافری سمسودین نے انڈونیشیا کے صدر پرابوو سوبیانٹو کی جانب سے وزیراعظم محمد شہباز شریف اور پاکستان کے عوام کے لئے نیک خواہشات کا اظہار کیا۔ انہوں نے انڈونیشیا کی پاکستان کے ساتھ دفاعی تعلقات کو مزید مضبوط بنانے اور مختلف شعبوں خصوصاً دفاعی پیداوار میں تعاون کے مزید مواقع تلاش کرنے کی خواہش کا اعادہ کیا۔\932