پاکستان: پی ایم ہاؤس سمیت ملک کے مختلف حصوں میں دیوالی منائی گئی

اسلام آباد (اُردو پوائنٹ ۔ DW اردو۔ 21 اکتوبر 2025ء) پاکستان کے وزیراعظم شہباز شریف نے پیر کی شب وزیراعظم ہاؤس میں دیوالی کی ایک تقریب سے خطاب میں ملک میں اقلیتوں کے قابل فخر کردار کو سراہتے ہوئے کہا کہ ''پاکستان امن، ہم آہنگی اور برداشت کی سرزمین ہے، یہاں نفرت، فتنہ فساد، انتشار اور دہشت گردی کے لیے کوئی گنجائش نہیں۔‘‘

وزیر اعظم نے کہا کہ مسلم اور غیر مسلم مل کر پاکستان کے خلاف ہونے والی کسی بھی شر انگیزی اور حملے کا مقابلہ کرتے ہیں اور اقلیتوں کے ساتھ کسی بھی نا انصافی کے قابل افسوس واقعات کو پاکستان کی اکثریت نے کبھی بھی پسند نہیں کیا اور ہمیشہ اس کی مذمت کی ہے۔

شہباز شریف نے کہا ہے کہ پاکستان میں اقلیتوں کو مذہبی آزادی حاصل ہے۔

(جاری ہے)

تقریب میں موجود اقلیتی فرقے کی افراد کی طرف اشارہ کرتے ہوئے پاکستانی وزیر اعظم نے کہا، ''آج یہاں اقلیتوں اور اکثریت کے مذہبی، سیاسی نمائندوں کی موجودگی تصور پاکستان کی عملی تصویر ہے، بانی پاکستان قائد اعظم محمد علی جناح نے 11 اگست کی تقریر میں اعلان کیا تھا کہ تمام مذاہب کے ماننے والے پاکستان میں اپنی عبادت گاہوں میں کسی خوف اور ڈر کے بغیر اپنی عبادت اور رسومات ادا کرسکتے ہیں، انہیں مذہبی آزادی حاصل ہے۔

ملک میں دیوالی کی تقریبات

روشنیوں کا تہوار دیوالی دنیا کے دیگر ملکوں کی طرح پاکستان کے مختلف حصوں میں بھی منایا گیا۔ اس موقع پر کراچی، حیدرآباد، عمرکوٹ اور سندھ کے کئی علاقوں میں مندروں کو خوبصورتی سے سجایا گیا اور عقیدت مندوں نے خوشحالی اور قومی اتحاد کے لیے دعائیں کیں۔

سیاسی اور سماجی رہنماؤں نے اس موقع پر ہندو برادری کو مبارکباد پیش کی اور امن، رواداری اور بین المذاہب ہم آہنگی کی قدروں پر زور دیا۔

اپنے پیغامات میں قومی اور صوبائی رہنماؤں نے کہا کہ پاکستان ایک ایسا ملک ہے جہاں تمام مذاہب کے ماننے والوں کو اپنی عبادت اور مذہبی تہوار عزت و وقار کے ساتھ منانے کی مکمل آزادی حاصل ہے۔

سیاسی رہنماؤں کے تہنیتی پیغامات

اپنے پیغام میں پاکستان کے صدر آصف علی زرداری نے اس بات پر زور دیا کہ دیوالی روشنی کی تاریکی پر اور نیکی کی بدی پر فتح کی علامت ہے، جو ہم سب کو امید، مثبت سوچ اور اتحاد کی یاد دلاتی ہے۔

پاکستان کی سرکاری خبر رساں ایجنسی اے پی پی کے مطابق پنجاب کی وزیراعلیٰ مریم نواز شریف نے اپنے پیغام میں مبارکباد پیش کرتے ہوئے کہا کہ دیوالی امن، خیرسگالی اور ہم آہنگی کا پیغام دیتی ہے۔ انہوں نے اقلیتی برادری کی فلاح و بہبود کے لیے اقدامات کا اعلان بھی کیا، جن میں "اسپیشل مائنارٹی کارڈ" اور "مائنارٹی ورچوئل پولیس اسٹیشن" شامل ہیں، جو سیف پنجاب وژن کے تحت انصاف تک مؤثر رسائی کو یقینی بنانے کے لیے متعارف کرائے جا رہے ہیں۔

پاکستان پیپلز پارٹی (پی پی پی) کے چیئرمین بلاول بھٹو زرداری نے کہا کہ دیوالی ہمیں یاد دلاتی ہے کہ روشنی ہمیشہ تاریکی پر غالب آتی ہے۔ انہوں نے اپنی پارٹی کے اس وژن کی تجدید کی کہ پاکستان ایک ایسا ملک ہو جہاں تمام مذاہب کے لوگ امن اور باہمی احترام کے ساتھ زندگی گزاریں۔
دری‍ں اثنا سندھ حکومت نے دیوالی کے موقع پر ہندو برادری کے لیے عام تعطیل کا اعلان کیا تھا اور گورنر ہاؤس کراچی میں مرکزی دیوالی تقریب منعقد کی گئی۔

ادارت: صلاح الدین زین