امریکہ کیلئے پی آئی اے کی براہِ راست پروازیں جلد بحال ہونے کا امکان

امریکی حکام سے مذاکرات میں پیشرفت ہوئی ہے، حکومت بین الاقوامی معیار پر پورا اترنے اور حفاظتی اقدامات میں بہتری کیلئے کام کر رہی ہے جس سے عالمی روٹس میں توسیع ہوگی؛ وفاقی وزیرِ ہوابازی خواجہ آصف کی گفتگو

ساجد علی منگل 21 اکتوبر 2025 10:37

امریکہ کیلئے پی آئی اے کی براہِ راست پروازیں جلد بحال ہونے کا امکان

اسلام آباد (اُردو پوائنٹ اخبارتازہ ترین۔ 21 اکتوبر2025ء) امریکہ کیلئے قومی فضائی کمپنی پی آئی اے کی براہِ راست پروازیں جلد بحال ہونے کا امکان پیدا ہوگیا، شمالی امریکہ میں مقیم پاکستانیوں کی جانب سے بلا تعطل پروازوں کی بڑی طلب موجود ہے۔ میڈیا رپورٹس کے مطابق امریکہ کے فیڈرل ایوی ایشن ایڈمنسٹریشن (ایف اے اے) کے ایک وفد نے حال ہی میں پاکستان کا دورہ کیا تھا تاکہ حفاظتی آڈٹ کیا جا سکے، اگر ان آڈٹس کے نتائج مثبت رہے تو پی آئی اے کو ایف اے اے کی جانب سے کیٹیگری ون کا درجہ مل سکتا ہے، جو امریکہ کے لیے براہِ راست پروازوں کی بحالی کے لیے ضروری ہے۔

اس حوالے سے وفاقی وزیرِ ہوابازی خواجہ آصف کا کہنا ہے کہ برطانیہ کے لیے پروازیں دوبارہ شروع کرنے کی منظوری ملنے کے بعد پاکستان سے اب امریکہ کے لیے بھی براہِ راست فضائی رابطے بحال کرنے کی تیاریاں جاری ہیں، اس سلسلے میں امریکی ہوابازی حکام کے ساتھ مذاکرات میں پیش رفت ہوئی ہے، امید ہے جلد اجازت مل جائے گی کیوں کہ حکومت بین الاقوامی معیار پر پورا اترنے اور حفاظتی اقدامات میں بہتری کے لیے کام کر رہی ہے، جس سے عالمی روٹس میں توسیع ممکن ہوگی۔

(جاری ہے)

علاوہ ازیں پی آئی اے نے اعلان کیا ہے کہ متحدہ عرب امارات کی اتحاد ایئر ویز کے ساتھ کوڈ شیئر معاہدہ ہوچکا ہے، یہ شراکت داری 31 اکتوبر سے نافذالعمل ہوگی اور اس کا دائرہ کار کارگو سروسز اور فریکوئنٹ فلائر پروگرامز تک پھیلے گا، پی آئی اے ترجمان نے کہا کہ یہ معاہدہ قومی فضائی کمپنی کیلئے ایک سنگ میل کی حیثیت رکھتا ہے، اس میں مسافر پروازیں بھی شامل ہوں گی، یہ انتظام خاص طور پر ان روٹس کے لیے فائدہ مند ہوگا جن پر پی آئی اے کی براہِ راست سروس موجود نہیں اور اس سے مسافروں کو اتحاد کے وسیع نیٹ ورک تک رسائی حاصل ہوگی، اس کوڈ شیئر معاہدے سے پی آئی اے کی سروس میں بہتری آئے گی اور آمدنی میں اضافے کی توقع ہے۔