کراچی: ماڑی پور میں گاڑی نالے کی دیوار سے ٹکرا گئی، 4 افراد جاں بحق جبکہ4زخمی

منگل 15 جولائی 2025 16:10

کراچی(اُردو پوائنٹ اخبارتازہ ترین - این این آئی۔ 15 جولائی2025ء)کراچی میں ماڑی پور گدھا گاڑی چوک کے قریب گاڑی نالے کی دیوار سے ٹکرا گئی۔پولیس کے مطابق حادثے میں 4 افراد جاں بحق اور 4 زخمی ہوگئے۔ جاں بحق ہونے والوں میں مرد، خاتون اور دو بچیاں شامل ہیں۔پولیس کے مطابق زخمی ہونے والے مرد، خاتون اور 2 بچوں کو اسپتال منتقل کردیا گیا ہے۔

(جاری ہے)

ڈی آئی جی ٹریفک کے مطابق جاں بحق افراد اور زخمیوں کا تعلق ایک ہی خاندان سے ہے، تمام افراد کا تعلق پنجاب سے ہے، متاثرہ فیملی پکنک منا کر ہاکس بے سے واپس آرہی تھی کہ حادثہ ہوا۔

پولیس حکام نے بتایا کہ ہاکس بے روڈ پر تیز رفتار کار ڈرائیور سے بے قابو ہو کر نالے کی دیوار سے جا ٹکرائی، حادثہ موڑ کاٹنے کے دوران پیش آیا۔انہوں نے بتایا کہ کار مکمل طور پر تباہ ہوگئی، لاشیں اور زخمیوں کو سول اسپتال منتقل کر دیا گیاہے۔