پاکستانی طلبہ اور پیشہ ور افراد کیلئے برطانوی ای ویزہ کی نئی سہولت کا آغاز

پاسپورٹ پر ظاہری سٹیکر ویزہ کی ضرورت ختم ہوگئی، ویزہ سسٹم میں یہ اصلاحات طلبہ اور پیشہ ور افراد کے لیے اپنی شناخت اور ویزہ اسٹیٹس ثابت کرنا بہت آسان بنا دیں گی؛ برطانوی ہائی کمشنر جین میریٹ کا بیان

ساجد علی منگل 15 جولائی 2025 15:34

پاکستانی طلبہ اور پیشہ ور افراد کیلئے برطانوی ای ویزہ کی نئی سہولت ..

اسلام آباد ( اُردو پوائنٹ اخبارتازہ ترین۔ 15 جولائی2025ء ) برطانیہ نے پاکستانی طلبہ اور پیشہ ور افراد کے لیے ای ویزہ کی نئی سہولت کا آغاز کردیا، جس کے تحت برطانیہ جانے والے زیادہ تر طلبہ اور پیشہ ور افراد کو 15 جولائی سے پاسپورٹ پر ظاہری سٹیکر ویزہ کی ضرورت ختم ہوگئی۔ تفصیلات کے مطابق برطانوی حکومت نے زیادہ تر طلبہ اور پیشہ ور افراد کے لیے ویزہ کی فزیکل امیگریشن دستاویزات کی جگہ ڈیجیٹل امیگریشن اسٹیٹس یعنی ای ویزہ متعارف کرایا ہے، ای ویزہ کسی فرد کی برطانیہ میں امیگریشن کی اجازت اور اس سے منسلک شرائط کا آن لائن ریکارڈ ہے، جسے یو کے ویزہ اینڈ امیگریشن (UKVI) کے اکاؤنٹ میں لاگ اِن کرکے دیکھنا ممکن ہے، ای ویزہ بارڈر اینڈ امیگریشن سسٹم کا ایک جدید نظام ہے جو ویزہ کے عمل کو مزید آسان، محفوظ، ڈیجیٹل اور مربوط بنائے گا۔

(جاری ہے)

پاکستان میں برطانوی ہائی کمشنر جین میریٹ نے بتایا کہ یو کے ویزہ سسٹم میں یہ اصلاحات طلبہ اور پیشہ ور افراد کے لیے اپنی شناخت اور ویزہ اسٹیٹس ثابت کرنا بہت آسان بنا دیں گی، اس کا ایک فائدہ یہ بھی ہے کہ درخواست دہندگان کو اپنا پاسپورٹ اپنے پاس رکھنے کی سہولت ملے گی جس سے ان کا وقت بچے گا، فزیکل دستاویز سے ای ویزہ پر منتقل ہونے سے کسی فرد کے امیگریشن اسٹیٹس یا برطانیہ میں داخلے یا قیام کی شرائط پر کوئی اثر نہیں پڑے گا، بہت جلد یہ سہولت تمام ویزہ کیٹیگریز پر نافذ کر دی جائے گی جس سے برطانوی ویزہ حاصل کرنے کا عمل مزید محفوظ، آسان اور مؤثر ہو جائے گا۔

The UK is launching eVisas in Pakistan for most students and workers applying for more than 6 months! It will make it simpler and safer, and you can hold on to your passport.

To find out more on eVisas and see whether you’re eligible, go to https://t.co/AHI9nWSoxw pic.twitter.com/tlZNSs2NpD
— Jane Marriott (@JaneMarriottUK) July 15, 2025

بتایا گیا ہے کہ ای ویزہ جن کیٹیگریز میں ویزہ کے لیے درخواست دہندگان کے لیے متعارف کرایا جا رہا ہے ان میں طلبہ، بشمول 11 ماہ کی مختصر مدت کی تعلیم، گلوبل بزنس موبیلٹی روٹس (جیسے سینئر یا سپیشلسٹ ورکر، گریجویٹ ٹرینی، یو کے ایکسپینشن ورکر، سروس سپلائر، سیکنڈمنٹ ورکر)، گلوبل ٹیلنٹ، انٹرنیشنل اسپورٹس پرسن، سکلڈ ورکر (بشمول ہیلتھ اینڈ کیئر ورکرز) اور عارضی کام کے راستے (جیسے چیریٹی ورکر، کریئیٹو ورکر، گورنمنٹ آتھورائزڈ ایکسچینج، انٹرنیشنل ایگریمنٹ، اور مذہبی ورک روٹس) اور یوتھ موبیلٹی سکیم شامل ہیں۔

معلوم ہوا ہے کہ ای ویزہ رکھنے والے افراد اپنی سفری دستاویز (جیسے پاسپورٹ) اپنے یو کے وی آئی (UKVI) اکاؤنٹ سے منسلک کرکے بین الاقوامی سفر آسان بنا سکتے ہیں، یو کے وی آئی اکاؤنٹ بنانے والے افراد "ویو اینڈ پروو" سروس کے ذریعے انگلینڈ میں تیسرے فریق جیسے آجر یا مکان مالک کو اپنا امیگریشن اسٹیٹس محفوظ طریقے سے دکھا سکیں گے، تاہم جو افراد بطور ڈپینڈنٹ درخواست دے رہے ہیں یا ایسے بنیادی درخواست دہندگان جو تعلیم یا پیشہ ورانہ کام کے علاوہ دیگر ویزہ کیٹیگریز (جیسے جنرل وزیٹر ویزہ) کے لیے اپلائی کریں گے انہیں بدستور فزیکل سٹیکر ویزا کی ضرورت ہوگی جب کہ جن کے پاس پہلے سے کارآمد فزیکل ویزہ اسٹیکر موجود ہے، انہیں مزید کسی اقدام کی ضرورت نہیں۔