بنوں میں سکیورٹی فورسز کا آپریشن، 3 دہشت گرد مارے گئے

دہشتگرد پولیس اہلکاروں کی ٹارگٹ کلنگ میں ملوث تھے، دہشتگردوں سے اسلحہ اور گولا بارود برآمد کیا گیا

ساجد علی جمعرات 17 جولائی 2025 11:03

بنوں میں سکیورٹی فورسز کا آپریشن، 3 دہشت گرد مارے گئے

بنوں ( اُردو پوائنٹ اخبارتازہ ترین۔ 17 جولائی 2025ء ) صوبہ خیبرپختونخواہ کے علاقہ بنوں میں سکیورٹی فورسز کے آپریشن میں 3 دہشت گرد مارے گئے ۔ میڈیا رپورٹس کے مطابق بنوں میں سی ٹی ڈی کی جانب سےآپریشن کےنتیجے میں ٹارگٹ کلنگ میں ملوث 3 دہشت گردوں کو ہلاک کردیا گیا، اس حوالے سے سی ٹی ڈی بنوں اور مقامی پولیس نے نواز آباد تھانہ میریان کے علاقے میں دہشت گردوں کی موجودگی کی اطلاع پر انٹیلی جنس بیسڈآپریشن کیا۔

ترجمان سی ٹی ڈی نے بتایا کہ آپریشن کے دوران فائرنگ کے تبادلے میں 3 دہشت گردوں کو ہلاک کیا جو پولیس اہلکاروں کی ٹارگٹ کلنگ میں ملوث تھے، آپریشن میں ہلاک ہونے والے دہشت گردوں سے اسلحہ اور گولا بارود برآمد کیا گیا، دہشت گردوں کا تعلق کالعدم ٹی ٹی پی ضرار گروپ سے تھا۔

(جاری ہے)

گزشتہ روز ڈیرہ اسماعیل خان کے علاقے کلاچی میں دہشت گردی کا افسوسناک واقعہ پیش آیا جہاں یادگار چوکی کے قریب نامعلوم افراد کی فائرنگ سے دو پولیس اہلکار شہید ہو گئے، شہید اہلکاروں کی شناخت گل محمد اور شہزاد خان کے نام سے ہوئی ہے جو یادگار پولیس چوک پر تعینات تھے، دونوں اہلکار قریبی دکان پر جارہے تھے کہ گھات لگائے دہشت گردوں نے ان پر فائرنگ کر دی، جس کے نتیجے میں شہید ہونے والے اہلکاروں کی میتیں کلاچی ہسپتال منتقل کر دی گئیں، واقعے کے بعد حملہ آور موٹرسائیکل پر فرار ہوگئے تھے تاہم پولیس کی جوابی فائرنگ کے نتیجے میں ایک دہشت گرد ہلاک اور دو زخمی ہوگئے۔

پولیس کا کہنا تھا کہ ہلاک دہشت گرد کے قبضے سے کلاشنکوف مع ایمونیشن بھی برآمد کیا گیا ، سیکیورٹی فورسز نے علاقے کو گھیرے میں لے کر سرچ آپریشن شروع کر دیا، سی ٹی ڈی اور ضلعی انتظامیہ کاسرچ آپریشن جاری رہا تاکہ دہشتگردوں کے دیگر ساتھیوں کو گرفتار کیا جا سکے اور علاقے کو مکمل طور پر محفوظ بنایا جا سکے جب کہ ہلاک ہونے والے دہشتگرد کے قبضے سے برآمد ہونے والے اسلحے میں کلاشنکوف اور بھاری مقدار میں ایمونیشن بھی برآمد ہوا ، جس سے واضح ہوتا ہے کہ دہشتگرد کسی بڑے حملے کی منصوبہ بندی کر رہے تھے۔

سیکیورٹی حکام نے بتایا کہ دہشتگردوں کے خلاف کارروائیاں مزید تیز کر دی گئی ہیں اور ان کے سہولت کاروں کو بھی جلد قانون کی گرفت میں لایا جائے گا، ڈی آئی خان میں حالیہ دہشتگردی کے واقعات کے بعد قانون نافذ کرنے والے ادارے مکمل الرٹ پر ہیں اور فتنہ الہندوستان سے وابستہ دہشتگرد عناصر کے خلاف بھرپور کارروائی جاری ہے، عوام سے بھی اپیل کی گئی ہے کہ کسی بھی مشکوک سرگرمی کی فوری اطلاع متعلقہ حکام کو دیں تاکہ امن دشمنوں کو ناکام بنایا جا سکے۔