Live Updates

بھارت میں شیڈول ہاکی ایونٹس میں شرکت کا فیصلہ حکومت کرے گی، سیکریٹری پی ایچ ایف

ٹیم کو ایشیا کپ کے لیے بھارت بھجوانے کا حتمی فیصلہ وزیر اعظم پاکستان کریں گے،رانا مجاہد کی بات چیت

منگل 15 جولائی 2025 19:50

لاہور (اُردو پوائنٹ اخبارتازہ ترین - این این آئی۔ 15 جولائی2025ء)پاکستان ہاکی فیڈریشن کے سیکریٹری جنرل رانا مجاہد نے کہا ہے کہ بھارت میں شیڈول ہاکی ایونٹس کے لیے حکومتی ہدایات کا انتظار ہے، وہ ہی کریں گے جو حکومت کہے گا۔ پریس کانفرنس کے دوران رانا مجاہد نے کہا کہ قومی کھیل پر توجہ دینے پر فیلڈ مارشل سید عاصم منیر کے شکر گذار ہیں۔ انڈر 18 ایشیا کپ، جونیئر ایشیا کپ اور نیشنز کپ میں پاکستان کی ٹیموں نے فائنل کھیلے ہیں۔

ہماری ٹیموں کی اچھی کارکردگی پر ٹیموں کی تعریف کی بجائے تنقید کی جارہی ہے۔ ہم نے 18 ویں رینکنگ سے شروع کیا اور ہم 12 نمبر پر آگئے ہیں۔اس وقت پاکستان ہاکی فیڈریشن ایشیا کپ کے حوالے نازک صورت حال میں ہے۔انہوں نے کہا کہ ایشیا کپ کے حوالے سے ہماری حکومت جو بھی فیصلہ کرے گی ہم اس پر عمل کریں گے۔

(جاری ہے)

ٹیم کو ایشیا کپ کے لیے بھارت بھجوانے کا حتمی فیصلہ وزیر اعظم پاکستان کریں گے۔

انہوں نے بتایا کہ نیشنز کپ اور انڈر 18 ایشیا کپ کے علاوہ کھلاڑیوں کو باقی ٹورنامنٹس کے ڈیلی الاؤنس مل گئے ہیں۔ ہم نے ایک ارب یا 70 کروڑ روپے کی رقم کا کوئی مطالبہ نہیں کیا۔ سیکریٹری آئی پی سی اور ڈی جی پی ایس بی سے میٹنگ میں طے پایا ہے کہ ہم نے اخراجات کی تفصیل بنا کر دینی ہے۔ ہاکی کے لیے کم ازکم سالانہ 75 کروڑ روپے کا بجٹ درکار ہے۔سیکریٹری پی ایچ ایف نے کہا کہ انٹرنیشنل ہاکی فیڈریشن نے پرو لیگ کے لییاکیس جولائی تک نیوزی لینڈ سے جواب مانگ رکھاہے، نیوزی لینڈ کے انکار کی صورت میں پاکستان کو موقع ملے گا۔ ہم سے ایف آئی ایچ نے اپنی دستیابی مانگ رکھی ہے۔