مون سون بارشوں سے مزید 6افراد جاں بحق، 26جون سے تاحال 111افراد جان کی بازی ہار چکے

اسلام آباد(اُردو پوائنٹ اخبارتازہ ترین - این این آئی۔ 15 جولائی2025ء)مون سون بارشوں کے سبب 24گھنٹے میں مزید 6افراد جاں بحق ہوگئے، 26جون سے 14جولائی تک مرنے والوں کی تعداد 111ہوگئی، محکمہ موسمیات نے (کل)جمعرات تک ملک کے مختلف علاقوں میں مزید بارشوں کی پیش گوئی کردی ہے۔نیشنل ڈیزاسٹر مینجمنٹ اتھارٹی کے مطابق ملک کے مختلف حصوں میں مون سون بارشوں کے باعث 26جون سے 14جولائی تک مرنے والوں کی تعداد 111ہوگئی ہے، جبکہ 212افرادزخمی ہوئے ہیں جن میں ایک بچہ بھی شامل ہے،جبکہ گزشتہ چوبیس گھنٹوں کے دوران مزید 6افراد جاںبحق جبکہ ایک بچہ زخمی ہواہے۔

محکمہ موسمیات نے خبردارکیاکہ (آج)بدھ کوپنجاب، اسلام آباد ،خیبر پختونخواہ، کشمیر میں ا کثر مقامات پر جبکہ شمال مشر قی/جنوبی بلو چستان ، جنوب مشرقی/ بالائی سندھ اور گلگت بلتستان میں کہیں کہیں تیز ہواؤں اور گرج چمک کے ساتھ موسلادھاربارش کی توقع ہے،جبکہ17جولائی تک شدیدموسلادھار بارش کے باعث ڈی جی خان، شمال مشرقی/بالائی پنجاب، اسلام آباد/راولپنڈی ، شمال مشرقی بلوچستان ، کشمیر، چترال، دیر، سوات، شانگلہ، مانسہرہ، مری، گلیات، کوہستان،ایبٹ آباد، بونیر، صوابی، نوشہرہ اور مردان کے مقامی /بر ساتی ندی نالوں میں طغیانی کا خطرہ ہے۔

(جاری ہے)

شدید بارشوں کے باعث خیبرپختونخوا، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ بھی موجودہے،شدید بارشوں کے باعث گوجرانوالہ، لاہور، سیالکوٹ، سرگودھا، فیصل آباد، ملتان، خا نیوال، سا ہیوال، لودھراں، مظفر گڑھ، کوٹ ادو، تونسہ، راجن پور،بہاولپور، نوشہرہ ، پشاور، اسلام آباد/راولپنڈی کے نشیبی علا قے زیر آب آنے کا خدشہ ہے، آندھی کے باعث کمزور انفرا اسٹرکچر (بجلی کے کھمبے، درخت ، گاڑیوں، سولر پینل وغیرہ)، کھڑی فصلوں کو نقصان کا اندیشہ ہے۔

محکمہ موسمیات کے مطابق گزشتہ 24گھنٹوں کے دوران پنجاب میں سب سے زیادہ بارش بہاولنگر میں86ملی میٹرریکارڈکی گئی۔ این ڈی ایم اے نے بتایاکہ اگلے 2سے 3دنوں کے دوران ملک کے مختلف علاقوں میں شدید بارشوں کے باعث شہروں میں سیلابی صورتحال جبکہ ندی نالوں میں طغیانی کا خدشہ ہے، پنجاب کے اضلاع راولپنڈی، سرگودھا، فیصل آباد، ساہیوال، چنیوٹ، ٹوبہ ٹیک سنگھ، نارووال، اوکاڑہ، جھنگ، بہاولنگر، ملتان، خانیوال اور بہاولپور میں آئندہ 24گھنٹوں میں آندھی اور طوفان سمیت شدید بارش کا امکان ہے۔

اسلام آباد اور گرد و نواح میں بھی موسلا دھار بارش متوقع ہے، 18جولائی تک لاہور، گوجرانوالہ، سیالکوٹ، مظفرگڑھ، ساہیوال، ملتان، کوٹ ادو، تونسہ اور بہاولپور کے شہری علاقوں میں سیلابی صورتحال کا امکان ہے، راجن پور،ڈی جی خان میں پہاڑی ندی نالوں /ہل ٹورنٹس میں طغیانی کا خطرہ ہے ،پیر پنجال رینج سے نکلنے والے نالوں میں پانی کے بہاؤ میں غیر معمولی اضافہ ہو سکتا ہے۔

این ڈی ایم اے کے مطابق خیبرپختونخوا کے اضلاع چترال، دیر، سوات، کالام، مانسہرہ، ایبٹ آباد، مردان، پشاور، کوہاٹ، بنوں اور وزیرستان میں آئندہ 24گھنٹوں کے دوران شدید بارش اور ممکنہ لینڈ سلائیڈنگ کا خدشہ ہے۔ حساس علاقوں کے مکین ہنگامی صورتحال کیلئے 3سے 5دن کی خوراک، پانی اور ادویات پر مشتمل ایمرجنسی کٹ تیار رکھیں۔