وفاقی وزیراحسن اقبال کی زیر صدارت اعلیٰ سطحی اجلاس، زرعی زمینوں کو برق رفتاری سے ہاؤسنگ سوسائٹیز میں تبدیل ہونے پر تشویش کا اظہار

بدھ 16 جولائی 2025 18:56

اسلام آباد (اُردو پوائنٹ اخبارتازہ ترین - اے پی پی۔ 16 جولائی2025ء) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال کی زیر صدارت زرعی زمینوں کو ہاؤسنگ سوسائٹیز میں تبدیل کرنے سے متعلق اہم اجلاس بدھ کویہاں منعقد ہوا۔ اجلاس میں وفاقی و صوبائی اداروں کے اعلیٰ حکام، سی ڈی اے اور متعلقہ وزارتوں کے نمائندگان نے شرکت کی۔

وفاقی وزیر نے اجلاس سے خطاب کرتے ہوئے پاکستان میں زرعی زمینوں کی تیزی سے کمی پر گہری تشویش کا اظہار کیا۔ انہوں نے کہا کہ زرعی زمینوں کو برق رفتاری سے ہاؤسنگ سوسائٹیز میں تبدیل کرنے کا سلسلہ مستقبل کی فوڈ سکیورٹی کے لئے ایک بڑا خطرہ ہے، آنے والی نسل کو خوراک کیسے مہیا ہوگی؟ ہمیں فوری طور پر اس رجحان کو روکنا ہوگا۔احسن اقبال نے واضح کیا کہ ملک میں بغیر منصوبہ بندی کے شہری پھیلاؤ بنیادی سہولیات کے بحران کو جنم دے رہا ہے اور اس کا اثر ماحولیاتی توازن پر بھی پڑ رہا ہے۔

(جاری ہے)

انہوں نے زور دیا کہ ہم اپنی زرعی زمین کا بےدریغ استعمال کر کے دراصل اپنی خوراک کا مستقبل بیچ رہے ہیں۔انہوں نے اسلام آباد میں فوری طور پر عمودی تعمیرات (Vertical Construction) کے آغاز پر زور دیا تاکہ شہری حدود میں ہی رہائشی ضروریات پوری کی جا سکیں۔احسن اقبال نے درختوں کی بے دریغ کٹائی پر سخت قوانین کی ضرورت پر زور دیتے ہوئے کہا کہ ماحولیاتی تحفظ ہم سب کی اجتماعی ذمہ داری ہے۔

وفاقی وزیر نے صوبائی حکومتوں کو ہدایت کی کہ گزشتہ 20 سالوں میں رہائشی سکیموں کی نذر ہونے والی زرعی زمین کا مکمل ڈیٹا جمع کیا جائے تاکہ پالیسی سازی کے لئے جامع معلومات دستیاب ہوں۔انہوں نے کہا کہ اربن ڈویلپمنٹ کے لئے قانون سازی اور ایک نیشنل فریم ورک ناگزیر ہے۔ وفاق صوبوں کے ساتھ مل کر زرعی زمینوں کے تحفظ اور ماحول دوست شہری ترقی کے لئے جلد پالیسی مرتب کرے گا۔