سابق گورنر لیفٹیننٹ جنرل (ر) عبدالقادر بلوچ نے ن پیپلز پارٹی سے استعفیٰ دیکر سیاست سے کنارہ کشی اختیار کرلی

بدھ 16 جولائی 2025 23:04

کوئٹہ(اُردو پوائنٹ اخبارتازہ ترین - این این آئی۔ 16 جولائی2025ء) سابق گورنر و وفاقی وزیر لیفٹیننٹ جنرل (ر) عبدالقادر بلوچ نے پاکستا ن پیپلز پارٹی سے استعفیٰ دیکر سیاست سے کنارہ کشی اختیار کرلی ۔ بدھ کو سابق گورنر بلوچستان، سابق وفاقی وزیر اور سابق رکن قومی اسمبلی لیفٹیننٹ جنرل (ریٹائرڈ) عبدالقادر بلوچ نے پاکستان پیپلز پارٹی (PPP) کی بنیادی رکنیت سے باضابطہ طور پر استعفیٰ دینے کا اعلان کردیا۔

انہوں نے یہ فیصلہ مشاورت اور غور و فکر کے بعد اپنے قریبی سیاسی رفقاء اور دوستوں سے تبادلہ خیال کے بعد کیا۔ اس حوالے سے رابطہ کر نے پر جنرل (ر) عبدالقادر بلوچ نے این این آئی کو بتایا کہ وہ اب پارٹی سیاست سے مکمل طور پر کنارہ کش ہو چکے ہیں۔ایک سوال کے جواب میں انہوں نے کہا کہ صحت اور دیگر مسائل کی بناء پر انہوں نے پارٹی سے استعفیٰ دیا ہے تاہم انہوں نے کسی قسم کے اختلافات کے حوالے سے تصدیق یا تردید نہیں کی ۔

(جاری ہے)

لیفٹیننٹ جنرل (ر) عبدالقادر بلوچ نے اپنے ایک بیان میں مزید کہا کہ وہ اب کسی بھی سیاسی سرگرمی یا وابستگی میں دلچسپی نہیں رکھتے، تاہم وہ اپنے سیاسی ساتھیوں کو مشورہ دیتے ہیں کہ وہ پارٹی کے اندر اپنی سیاسی سرگرمیاں اور خدمات حسب سابق جاری رکھیں۔انہوں نے ان تمام افراد کا تہہ دل سے شکریہ ادا کیا ہے جنہوں نے ان کے طویل سیاسی سفر میں ان کا ساتھ دیا وہ اس کے بعد بھی پاکستان کی خدمت اپنی نجی حیثیت میں جاری رکھیں گے۔