Live Updates

مون سون بارشوں سے آبی ذخائر کی سطح میں اضافہ‘ پانی کا ذخیرہ 83 لاکھ ایکڑ فٹ تک پہنچ گیا . ترجمان ارسا

تربیلا ڈیم میں پانی کی سطح مسلسل بلند ہونے کے باعث اسپیل ویز کھول دیے گئے ہیں‘ چشمہ بیراج میں پانی کی گنجائش صرف ایک فٹ رہ گئی ہے. رپورٹ

میاں محمد ندیم جمعرات 17 جولائی 2025 15:34

مون سون بارشوں سے آبی ذخائر کی سطح میں اضافہ‘ پانی کا ذخیرہ 83 لاکھ ایکڑ ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔17 جولائی ۔2025 )مون سون بارشوں سے آبی ذخائر بڑھ گئے جبکہ قابل استعمال پانی کا ذخیرہ 83 لاکھ ایکڑ فٹ تک پہنچ گیا ترجمان ارسا کے مطابق تربیلا ڈیم میں پانی کی سطح مسلسل بلند ہونے کے باعث اسپیل ویز کھول دیے گئے ہیں. ترجمان ارسا کے مطابق منگلا ڈیم میں پانی کی سطح 1186 فٹ تک پہنچ گئی ہے جبکہ 1242 فٹ پر ڈیم بھر جاتا ہے ترجمان ارسا کے مطابق چشمہ بیراج میں پانی کی سطح 648 فٹ تک پہنچ گئی ہے جبکہ پانی کی گنجائش صرف ایک فٹ رہ گئی، ترجمان کا کہنا ہے کہ ڈیمز کی صورتحال مکمل کنٹرول میں ہے تاہم اربن فلڈنگ ہورہی ہے.

(جاری ہے)

واضح رہے کہ پنجاب بھر میں کئی روز سے بارشوں کا سلسلہ جاری ہے، راولپنڈی اسلام آباد میں گزشتہ روز سے بارشیں جاری ہیں، راولپنڈی میں 15 گھنٹے میں 230 ملی میٹر بارش ریکارڈ کی جاچکی ہے جبکہ مسلسل بارش کے باعث نالہ لئی کی سطح 18 فٹ تک بلند ہوگئی ہے جبکہ نالہ لئی کی انتہائی سطح 20 فٹ ہے. چکوال میں کلاﺅڈ برسٹ کے باعث طوفانی بارش ہوئی جبکہ 10 گھنٹے کے دوران423 ملی میٹر بارش سے سیلابی صورتحال پیدا ہوگئی، منڈی بہاﺅالدین شہر میں بھی 210 ملی میٹر بارش ریکارڈ کی گئی تھی جس کے باعث سڑکیں اور گلیاں تالاب میں بدل گئی تھیں دوسری جانب پراونشل ڈیزاسٹر مینجمنٹ اتھارٹی (پی ڈی ایم اے) نے پنجاب بھر میں آج بھی بارش کا الرٹ جاری کردیا ہے.