وزیراطلاعات آزاد کشمیر مظہر سعید شاہ کی وفاقی وزیر مذہبی امور س ردار محمد یوسف سے ملاقات

جمعرات 17 جولائی 2025 19:15

اسلام آباد (اُردو پوائنٹ اخبارتازہ ترین - این این آئی۔ 17 جولائی2025ء)وزیر اطلاعات آزاد حکومت ریاست جموں وکشمیر پیر محمد مظہر سعید شاہ نے وفاقی وزیر برائے مذہبی امور سردار محمد یوسف سے ملاقات کی۔ اس موقع پر پنجاب کے پارلیمانی سیکرٹری برائے اوقاف ملک افتخار احمد بھی موجود تھے۔ وزیر اطلاعات آزاد کشمیر پیر محمد مظہر سعید شاہ نے وفاقی وزیر برائے مذہبی امور سردار محمد یوسف کو سعودی عرب کی جانب سے حج مشن 2025 میں شامل تمام ممالک میں سے بہترین انتظامات پر ایوارڈ ملنے پر مبارکباد پیش کی۔

ملاقات میں آزاد کشمیر حکومت کے ساتھ مل کر مذہبی و مسلکی ہم آہنگی پر کام کرنے پر اتفاق کیا گیا اور نئی حج پالیسی پر بھی تبادلہ خیال کیا گیا۔ وزیر اطلاعات پیر محمد مظہر سعید شاہ نے وفاقی وزیر سردار محمد یوسف کو آزاد جموں و کشمیر کے دورے کی باضابطہ دعوت دی جو انہوں نے قبول کر لی۔

(جاری ہے)

وفاقی وزیر سردار محمد یوسف نے کہا کہ آزادکشمیر میں مسلکی ہم آہنگی برقرار رکھنے اور اسلامی اقدار کے فروغ میں وہاں کے علماء کرام و مشائخ عظام کا اہم کردار ہے۔

حکومت آزادکشمیر کے ساتھ مل کر مذہبی و مسلکی ہم آہنگی کے فروغ کیلئے کام کریں گے۔اس موقع پر گفتگو کرتے ہوئے وزیر اطلاعات پیر محمد مظہر سعید شاہ نے کہا کہ سعودی عرب کی جانب سے پاکستان کی وزارت مذہبی امور کو بہترین حج انتظامات کا ایوارڈ ملنا ہمارے لیے باعث اعزاز ہے، انہوں نے سردار محمد یوسف کی پیشہ وارانہ صلاحیتوں کی بھی ستائش کی۔ وزیر اطلاعات آزاد کشمیر نے کہا کہ آزادکشمیر میں بہترین مذہبی و مسلکی ہم آہنگی موجود ہے، امن و امان کے لحاظ سے آزاد کشمیر پاکستان بھر میں پر امن خطہ ہے۔ اللہ کا شکر ہے محرم الحرام کے دوران مثالی مسلکی ہم آہنگی اور امن و امان برقرار رہا۔