آئی سی سی: نیتن یاہو کے وارنٹ گرفتاری واپس لینے کی اسرائیلی درخواست مسترد

یو این جمعرات 17 جولائی 2025 20:30

اسلام آباد (اُردو پوائنٹ ۔ UN اردو۔ 17 جولائی 2025ء) عالمی فوجداری عدالت (آئی سی سی) نے اسرائیل کی جانب سے اس کے وزیراعظم بنجمن نیتن یاہو اور سابق وزیر دفاع یوآو گیلنٹ کی گرفتاری کے وارنٹ واپس لینے کی درخواست مسترد کر دی ہے۔

عدالت نے اسرائیل کی جانب سے فلسطینی علاقوں میں مبینہ ظالمانہ جرائم پر وسیع تر عدالتی تحقیقات معطل کرنے کی درخواست کو بھی خارج دیا ہے۔

'آئی سی سی' نے 21 نومبر 2024 کو دونوں شخصیات کے علاوہ حماس کے رہنما ابراہم المصری (محمد ضیف) پر جنگی اور انسانیت کے خلاف جرائم کے الزام میں ان کی گرفتاری کے وارنٹ بھی جاری کیے تھے۔ عدالت نے کہا تھا کہ یہ یقین کرنے کی معقول وجہ موجود ہے کہ یہ شخصیات غزہ کی جنگ میں ایسے مبینہ جرائم کی مرتکب ہوئی ہیں۔

(جاری ہے)

حالیہ فیصلے میں عدالت نے کہا ہے کہ اس نے المصری کی موت سے متعلق قابل بھروسہ اطلاعات سامنے آںے کے بعد ان کی گرفتاری کے وارنٹ واپس لے لیے ہیں۔

عدالت نے فلسطین کو عدالت کے روبرو اپنی بات سے روکنے کے لیے اسرائیل کی درخواست کو بھی مسترد کر دیا ہے۔

عدالتی دائرہ اختیار پر اعتراض

اسرائیل نے عدالت کے دائرہ اختیار پر سوال اٹھاتے ہوئے غزہ میں جنگی جرائم سے انکار کیا ہے۔ اس کے وکلا نے عدالت کے روبرو کہا کہ رواں سال اپریل میں اپیل چیمبر کی جانب سے قبل از سماعت چیمبر کو عدالتی دائرہ اختیار پر اسرائیل کے اعتراضات کا جائزہ لینے کے حکم کا مطلب یہ ہے کہ اس وارنٹ کی کوئی قانونی بنیاد نہیں ہے۔

ججوں نے اسرائیل کے استدلال کو غلط قرار دیتے ہوئے کہا کہ وارنٹ گرفتاری سے متعلق عدالتی اختیار پر اسرائیل کے اعتراض پر سماعت زیرالتوا ہے اور جب تک عدالت اس پر الگ فیصلہ نہیں دے دیتی اس وقت تک وارنٹ برقرار رہیں گے۔ تاہم، عدالت نے یہ نہیں بتایا کہ دائرہ اختیار کے معاملے پر فیصلہ کب آئے گا۔

گزشتہ ماہ امریکہ نے 'آئی سی سی' کے چار ججوں پر پابندیاں عائد کی تھیں جن میں سے دو جج اس بینچ میں بھی شامل ہیں جنہوں نے نیتن یاہو اور یوآو گیلنٹ کے وارنٹ گرفتاری منسوخ کرنے کی اسرائیلی درخواست کو مسترد کیا ہے۔