وطن لوٹنے والے افغان مہاجرین کو عالمی توجہ کی فوری ضرورت، یو این

اسلام آباد (اُردو پوائنٹ ۔ UN اردو۔ 17 جولائی 2025ء) اقوام متحدہ نے عالمی برادری سے افغانستان میں واپس آنے والے پناہ گزینوں کی فوری مدد کے لیے اپیل کرتے ہوئے کہا ہے کہ خشک سالی اور شدید انسانی بحرانوں سے متاثرہ ملک ان لوگوں کو سنبھالنے کی سکت نہیں رکھتا۔

افغانستان کے لیے اقوام متحدہ کی خصوصی نمائندہ روزا اوتنبائیوا نے بتایا ہے کہ روزانہ ہزاروں افغان مہاجرین ایران اور پاکستان سے واپس آ رہے ہیں۔

انہوں ںے ایران کے ساتھ افغانستان کے سرحدی علاقے اسلام قلعہ کے دورے میں صحافیوں سے بات کرتے ہوئے کہا کہ بہت سے پناہ گزینوں کو اچانک اور غیررضاکارانہ طور پر واپس آنا پڑا ہے جو سبھی کی مشترکہ انسانیت کا امتحان ہے اور یہ صورتحال عالمی برادری کے لیے خطرے کی علامت ہونی چاہیے۔

(جاری ہے)

اس دورے میں خصوصی نمائندہ نے واپس آنے والے پناہ گزینوں، اقوام متحدہ کے امدادی شراکت داروں اور علاقائی حکام سے بھی ملاقاتیں کیں۔اس موقع پر انہوں نے کہا کہ اقوام متحدہ کے اداروں اور مقامی حکام کی انتھک کوششوں اور عوامی سطح پر ان پناہ گزینوں کو دی جانے والی مدد کے باوجود واپس آنے والوں کی تعداد اور رفتار انہیں مدد فراہم کرنے کے نظام پر حاوی ہے۔

امدادی اداروں کا امتحان

رواں سال 13 لاکھ سے زیادہ افغان پناہ گزین اپنے ملک واپس آ چکے ہیں جس سے ملکی وسائل پر بوجھ بڑھ گیا ہے جہاں پہلے ہی 70 فیصد آبادی خط غربت سے نیچے زندگی گزار رہی ہے۔ خواتین اور بچوں کے لیے خطرات کہیں زیادہ ہیں جنہیں معاشی مشکلات کے علاوہ بنیادی خدمات اور سماجی تحفظ کے بحران کا سامنا بھی ہے۔

امدادی کارروائیوں کے لیے مالی وسائل کی بھی شدید قلت ہے جس کے باعث امدادی اداروں کو خوراک، پناہ اور پناہ گزینوں کے لیے محفوظ راستے کی فراہمی جیسے اقدامات میں کڑا انتخاب درپیش رہتا ہے۔

روزا اوتنبائیوا نے کہا کہ افغانستان میں ان لوگوں کو مقامی معاشرے میں ضم ہونے کے لیے بھی مدد فراہم کی جانی چاہیے۔ ابتدائی جائزوں سے ظاہر ہوتا ہے کہ واپس آنے والے پناہ گزینوں کی زندگی میں استحکام لانے کے لیے انہیں روزگار کی فراہمی کے ہنگامی اقدامات اور مقامی سطح پر بنیادی ڈھانچے پر سرمایہ کاری کی ضرورت ہوتی ہے۔

فوری اقدامات کی عدم موجودگی، ترسیلات زر کے خاتمے، افرادی قوت کی منڈی پر دباؤ اور متواتر مہاجرت کے تباہ کن نتائج برآمد ہوتے ہیں۔

افغانوں کا ساتھ دینے کی اپیل

خصوصی نمائندہ نے عطیہ دہندگان، ترقیاتی شراکت داروں اور خطے کی حکومتوں سے کہا ہے کہ وہ افغانوں سے منہ مت موڑیں اور واپس جانے والوں کو تنہا نہ چھوڑا جائے۔

انہوں نے افغانستان کے لیے ایسے مربوط طریقہ کار کے لیے کہا ہے جس سے امدادی ضروریات کے لیے وسائل مہیا ہو سکیں اور جن علاقوں میں لوگ واپس آ رہے ہیں وہاں امداد کی فراہمی میں اضافہ کیا جا سکے۔

روزا اوتنبائیوا نے ایران، پاکستان اور وسطی ایشیائی ممالک کے ساتھ علاقائی بات چیت پر بھی زور دیا ہے تاکہ افغان مہاجرین کی رضاکارانہ، باوقار اور محفوظ واپسی کو یقینی بنایا جا سکے۔