امریکی قونصل خانہ کراچی میں 249ویں یوم آزادی کی تقریب کا انعقاد

جمعہ 18 جولائی 2025 13:10

کراچی(اُردو پوائنٹ اخبارتازہ ترین - این این آئی۔ 18 جولائی2025ء)امریکی قونصل خانہ کراچی نے گزشتہ روزریاست ہائے متحدہ امریکا کی آزادی کی 249ویں سالگرہ کی خوشی میں ایک پرمسرت اور "کنٹری ویسٹرن" موضوع پر مبنی تقریب کا اہتمام کیاگیا۔قونصل جنرل اسکاٹ اربام نے وزیر اعلی سندھ مراد علی شاہ، گورنر سندھ کامران ٹسوری، اورحکومتی عہدیداران، نجی شعبے، سول سوسائٹی، اور سفارتی برادری کے معزز مہمانوں کو خوش آمدید کہا۔

اس رنگا رنگ تقریب میں امریکا کے مغربی خطے کی سرحدی روح کو خراجِ تحسین پیش کیا گیا۔ اس موقع پر روایتی کنٹری ویسٹرن موسیقی، لائن ڈانسنگ اور خصوصی کھانے پیش کیے گئے۔ تقریب میں امریکا اور پاکستان کے درمیان بڑھتی ہوئی معاشی شراکت داری اور سفارتی تعاون کو اجاگر کیا گیا۔

(جاری ہے)

قونصل جنرل اربام نے دونوں ممالک کے درمیان تجارت اور سرمایہ کاری کے روابط بڑھانے میں امریکی قونصل خانے کے کردار پر روشنی ڈالی۔

انہوں نے کہاکہ،امریکہ پاکستان کی ترقی میں معاونت کے لیے تجارت، سرمایہ کاری، اور اختراع کے ذریعے پرعزم ہے۔ باہمی ترقی وشراکت داری کو مزید مستحکم کرنے کے لیئے ہم ملکرنئے باب رقم کر سکتے ہیں۔ریاست ہائے متحدہ امریکا اور پاکستان کے درمیان تعلیم، تجارت، کاروباری مواقع، سلامتی اور صحت جیسے کئی شعبوں میں طویل شراکت داری اور تعاون کی تاریخ ہے۔ یہ کوششیں دونوں ممالک کے مضبوط تعلقات اور مشترکہ اہداف کی عکاسی کرتی ہیں۔