پاکستانی فلم انڈسٹری کے لیجنڈ اداکار محمد علی کا 94 واں یوم پیدائش ہفتہ کو منایاگیا

ہفتہ 19 جولائی 2025 12:41

ٹھٹھہ صادق آباد(اُردو پوائنٹ اخبارتازہ ترین - این این آئی۔ 19 جولائی2025ء)پاکستانی فلم انڈسٹری کے لیجنڈ اداکار محمد علی کا94واں یوم پیدائش ہفتہ کومنایا گیا ،ان کے مداح کی جانب سے خصوصی تقریبات کا اہتمام کیاگیا۔ معروف فلمی اداکار محمد علی جولائی19جولائی 1931ء کو بھارت کے شہر رام پور میں پیدا ہوئے انہوںنے اپنے فنی کیرئر کا آغاز ریڈیو پاکستان کراچی سے کیا ،انہوں نے پونے تین سو کے قریب فلموں میں کام کیا جن میں اردو،پنجابی،پشتو ،بنگالی اور ہندی فلمیں شامل ہیں فلم ’’چراغ جلتا رہا ‘‘ ان کے فلمی کیرئر کی پہلی فلم تھی انہیں فلم دوریاں پر سپیشل ایوارڈ سے نوازا جا چکا ہے ۔

اداکار محمد علی کی معروف فلمی ہیروئین ان کی بیوی ’’زیبا ، شبنم،دیبا،رانی،شمیم آرا،ممتاز،سنگیتا،فردوس،نیئر سلطانہ،زمرد،نغمہ،نیلو،آسیہ،بابرہ شریف،نشو،مسرت شاہین اور دیگر شامل ہیں۔

(جاری ہے)

اداکارمحمد علی سابق وزیر اعظم ذوالفقار علی بھٹو کے قریبی ساتھیوں میں شمار ہوتے تھے ۔انہوں نے سابق صدر جنرل ضیاء الحق کے دور حکومت میں جیل بھی کاٹی تھی ادا کار محمد علی کو یہ اعزاز بھی حاصل ہے کہ لاہور میں منعقد ہونے والی اسلامی سربراہی کانفرنس کے دوران سعودی عرب کے بادشاہ شاہ فیصل مرحوم نے،ذوالفقار علی بھٹو شہید،سلطان قابوس، اور دیگر عالمی لیڈروں نے ان کے بنگلے پر قیام کیا تھاان کے سابق وزیر اعظم میاں محمد نواز شریف کے ساتھ گہرے دوستانہ تعلقات تھے وہ ان کی حکومت میں ثقافت کے مشیر بھی رہے ہیں ۔

فلم ’’ دم مست قلندر ‘‘ ان کی زندگی کی آخری فلم تھی ان کا انتقال 19مارچ 2006ء کو دل کے دورے کے باعث ہوا ان کی عمر 75برس تھی ۔