بلوچستان میں سکیورٹی فورسز کا فتنہ الہندوستان کیخلاف آپریشن، 4 دہشتگرد ہلاک

خفیہ اطلاعات پر کی جانے والی کارروائی میں دہشت گردوں کی مشکوک نقل و حرکت کو بروقت نشانہ بنایا گیا

ساجد علی اتوار 20 جولائی 2025 15:26

بلوچستان میں سکیورٹی فورسز کا فتنہ الہندوستان کیخلاف آپریشن، 4 دہشتگرد ..

کوئٹہ ( اُردو پوائنٹ اخبارتازہ ترین۔ 20 جولائی 2025ء ) بلوچستان میں سکیورٹی فورسز کے فتنہ الہندوستان کے خلاف آپریشن میں 4 دہشتگرد ہلاک ہوگئے۔ میڈیا رپورٹس کے مطابق بلوچستان کے حساس علاقے پہرود میں فتنہ الہندوستان کے دہشت گردوں کے خلاف خفیہ اطلاع پر کیے گئے آپریشن میں چار دہشت گردوں کو ہلاک کیا گیا، اس حوالے سے کارروائی 19 اور 20 جولائی 2025 کی درمیانی شب کی گئی، اس دوران دہشت گردوں کی مشکوک نقل و حرکت کو بروقت نشانہ بنایا گیا۔

ذرائع نے بتایا ہے کہ آپریشن میں نا صرف 4 دہشتگرد مارے گئے بلکہ ان کے قبضے سے فتنہ الہندوستان کا جھنڈا، جدید ہتھیار اور خفیہ سامان بھی برآمد ہوا، فتنہ الہندوستان کا نیٹ ورک حالیہ دنوں میں نہتے شہریوں، خواتین اور بچوں کو نشانہ بناتا رہا ہے اور ان کی بزدلانہ کارروائیاں قومی سلامتی کے لیے ایک سنگین خطرہ بن چکی تھیں، علاقے میں کلیئرنس آپریشن اب بھی جاری ہے تاکہ کسی بھی چھپے ہوئے دہشت گرد یا ان کے سہولت کار کو انجام تک پہنچایا جا سکے۔

(جاری ہے)

سکیورٹی فورسز نے اس عزم کا اظہار کیا ہے کہ وطن عزیز کو عدم استحکام سے دوچار کرنے والے ان ناپاک عزائم کو ہر قیمت پر ناکام بنایا جائے گا، فتنہ الہندوستان کے دہشتگردوں اور ان کے سہولت کاروں کو اب نشان عبرت بنایا جائے گا تاکہ کوئی اور دشمن پاکستان کی طرف میلی آنکھ سے دیکھنے کی جسارت نہ کرے۔